Serchhip DC-in LTF-te a kawm

Serchhip DC Dr Lalzirmawia Chhangte chuan nimin khan Serchhip khawpui chhunga local task force (LTF) aiawhte DC confe­rence hall-ah a kawm a, inkharkhip thawh hnihna kalpui mekah nasa lehzuala ṭan la ṭheuh turin a sawm.

Mizoramin state dangte neih ve loh LTF a nei chu kan vanneih thu sawiin Dr Lalzirmawia Chhangte chuan, "Covid-19 laka kan him zel theih nan tuna kan tih ang bak hi chu khawvel hian tih dan dang a hre bik chuang lo a, a damdawi hmuhchhuah a la nih loh avangin tuna kan hmalakna hi mawlmang viau mah se, invenna tha ber a ni rih a ni," a ti a, LTF-te chu theihtawp chhuaha intuai thar sauh sauh turin a chah.

Meeting-ah hian SDO (S) C Lalduh­zuali'n district level-a an hmalakna leh inkaihhruaina hrang hrangte a sawifiah a, election officer Vanlalhmachhuana'n Supply Chain Committee hmalaknate a sawifiah bawk.

Meeting-ah hian Serchhip khaw chhunga LTF aiawhte an tel kim a, ṭha zawka inkhar­khipna kalpui a nih theih nan rawtna hrang hrang an neihte ngaihthlak niin, an huam chhung ṭheuhah khauh zawka inkharkhipna kalpui ṭheuh an tum thu an sawi hlawm a ni.