Bairabi-Sairang rêl kawng endik zawh a ni

Hortoki leh Sairang inkara rêl kawng siam tharah nimin khan speed trial neih leh a ni a, zawh nghal a ni. Northeast Frontier Railways chief public relations officer Kapinjal Kishore Sharma chuan, Bairabi-Sairang rêl kawng enfiahna (commissioning) chu zawh a ni tâk thu a tarlang.

NEF Railways PRO tarlan danin, Bairabi-Sairang rel kawngah hian Bairabi-Hortoki bik chu nikum lam khan commission a lo ni tawh a; Hortoki-Sairang chu June 4, 2025 khan a vawi khat nan speed trial a ni a, nimin khan a vawi hnih nan speed trial leh niin, Commissioner of Railway Safety (CRS) hoin commissioning pawh zawh nghal a ni.

Hortoki-Sairang inkar km. 33.864-a thuia speed trial hi Commissioner of Railway Safety (Northeast Frontier Circle) Sumeet Singhal hoa neih a ni a; darkar khata km. 100-a chakin rel tlantir a ni. Commissioning tih zawh a nih tak avangin Mizoram chu national railway network-ah a tel ve ta tih PRO chuan a tarlang.

Sairang thlengin mihring leh bungraw phur rêl tlan ṭhin tura ruahman niin, darkar khata km. 90 vela chakin rêl a tlan thei tura ngaih a nih thu PRO chuan a tarlang bawk.

Bairabi-Sairang rêl kawng hi a zau chi (broad gauge) niin, km. 51.38-a thui a ni a, leiverh (tunnel) 48, lei lian 55 leh lei tê 87 a awm. Leiverh sei zawng belhkhawm chu metre 12,853 (km. 12.853) a ni a; lei sang ber chu lei aṭangin metre 104-a sang a ni. Rel kawng hi section pali-ah ṭhen a ni a, chu'ngte chu Bairabi-Hortoki, Hortoki-Kawnpui, Kawnpui-Mualkhang leh Mualkhang-Sairang a ni.