Year of Consolidation a zo, hna thawk turin phûr takin ke kan pên ṭan - CM

Chief minister Lalduhoma chuan, ZPM sorkarin inrenchem leh insawhngheh kum (Year of Consolidation) an hman zawh tawh thu leh, hmasawnna hna thawk turin phûr taka ke an pên ṭan thu a sawi a; tui chu natural resources pawimawh a nih avangin a theihna apiangah hman ṭangkai an tum thu a sawi bawk.

CM Lalduhoma hian June 9, Thawhṭannia Mizoram State Water Informatics Centre a hawnnaah thu sawiin, "Tunah hian kan sorkar pawhin Year of Consolidation kan han hmang zo a, committed liability an ti a, department hnena project thar tihna tura pawisa kan pek hi sorkar hmasa lama bill hlui rulh nan an hmang an hmang mai a, kan inrûl zo ṭep tawh a, ke kan pên ve ṭan dawn niin kan hria a, phûr takin project tharah hma lain kan ṭuan ṭan a ni," a ti.

Hmasawnna a awm dawn chuan environment-in a tawrh loh theih loh thu leh, environment chhe tlem thei ang bera thil tih a ṭul thu sawiin Lalduhoma chuan, "Tui hi kan natural resource pawimawh a ni tih kan hria a, a theihna apiangah hman ṭangkai kan tum. Tunah hian Power Ministry hnuaia awm Satluj Jal Vidyut Nigam (SJVN) chuan pump storage project an rawn siam dawn mek a, chuta ṭang chuan kawlphetha megawatt 2,400 a pe chhuak dawn," a ti a; tun hnaia Delhi-a a zinnaah Power Minister nen an sawiho thu leh SJVN hotute nen project an enho thu a sawi.

Chief Minister chuan, pump storage project chu tuikhuah lian tak tak siam ang a ni lo tih sawiin, "Darzo luiah reservoir lian tak an dah ang a, chuta ṭang chuan anmahni solar power siam aṭangin km. 2 leh a chanve vela thui Darzo khaw chungah reservoir lian siamin, chhûnah tui an pump chho ang a, zan lamah chumi aṭanga tui an haw lêttir hmangin power an siam dawn a, India rama pumping system lian ber tur a ni dawn," a ti.

Pump storage project-ah tui a ngai tam lo tih sawiin CM chuan, "Tui khuah sa a kual dawn a ni. Project hian hun a la duh rei dawn a, a panna kawng leh lei (bridge) pawh min siam sak vek dawn. A nghah chhung a rei dawn em mai tiin lui tê deuh, megawatt 30-50 siam thei tur kan ngah a, kum 2/3 chhungin a thar rang tur min siamsak ru kan ti a, chumi tur chu min rawn hrilh ru, an ti a, lui 4/5 vel ruahman turin kan inbuatsaih dawn mek," a ti a; he project-ah hian ram tihchhiat tur a tam dawn loh thu a sawi.

Lalduhoma chuan, Serchhip Mat luia Hmawngawnah tuikhuah siam tum a nih thu sawiin, "Serchhip khawpui tuia châwmna tur te, tourism leh fishery hmunpui tur bakah, Mat phai leilet châwm theihna turin kan ruahman dawn a, cheng vbc 177-in min duansak a, naktuk tuk leh (June 11)-ah Guwahati-ah kan official-te'n Brahmaputra Board hotute an sawipui dawn," a ti a, DPR siam turte an tihfel theih a beisei thu a sawi.

Chief Minister chuan, Mizorama hydel project hman mek leh hluihlawn tawh pariat/pakua vel tihchangtlunsak duhtu an hmu tih sawiin, "Senso zawng zawng an tum vek dawn. Kan inbe mek a, kawlphetha lamah kan intodelh chho zel turah kan ngai," a ti.