KHAWTHLIR

Civil defence training buatsaih

Ministry of Home Affairs hnuaia Directorate General-Fire Service, Civil Defence & Home Guards chuan June 9, Thawhṭanni khan Central Training Institute (CTI), Sesawngah chawlhkar khat awh tur Training of Trainers on Civil Defence an buatsaih ṭan. Training-ah hian Mizoram Home Guards & Civil Defence-a thawktute leh civil defence lama tawnhriat nei tawh volunteer mi 25 an tel a; trainer course zote'n district hrang hranga Civil Defence Corp tura ruatte training an neihpui leh ang.

MAHFED khawmpui

Mizoram State Agriculture Horticulture Forestry & Marketing Cooperative Federation (MAHFED) Ltd. chuan nimin khan Synod Conference Centre-ah General Assembly vawi 27-na an hmang a; Cooperative Societies registrar John LT Sanga'n a hmanpui. Inkhawmpui hi MAHFED chairman R Lalhruaitluanga'n a kaihruai a, chawhnu lamah rorel inkhawm neih a ni. MAHFED hi kum 1986-ah Mizoram State Cooperative Fruit Forestry & Vegetable Federation Ltd. tia din a ni a, kum 2010-ah MAHFED tiin thlak a ni.

MZP-in chawimawi

MZP Headquarters, Lunglei chuan nimin khan Lunglei Convention Centre-ah chawimawina hun an hmang a, Lunglei district education officer K Lalrintluangi khuallian a ni. He hunah hian Lunglei khawpui chhunga kumin HSLC leh HSSLC-a distinction pass te, MPSC Combined Competitive Exam-a tling tharte leh Lunglei MZP hruaitu hlui zinga zirnaa hlawhtlingte hnenah chawimawina hlan a ni.

DAJGUA sawiho

Lunglei, Siaha, Champhai leh Kolasib-a District Planning Committee hotute chu nimin khan an district bawrhsapte kaihhruaiin an ṭhukhawm. Dharti Aaba Janjatiya Gram Utkarsh Abhiyan leh India Danpui Article 275 hnuaia schedule tribe mipuite'n hamṭhatna an dawn theih chungchang bakah, kum 2025-26 atana department hrang hrangin hmasawnna tur project an thehluhte sawiho a ni.