Mahni chhungkua hlamchhiah lo turin Social Welfare Minister-in nute a chah

MHIP General Headquarters leh Aizawl District Nasha Mukt Bharat Abhiyaan (Drug Free India Campaign) chuan nimin khan Ṭhuampui YMA Hall-ah ruihhlo chungchang inzirtirna leh a thlawnna inentirna an buatsaih a; khuallian Social Welfare minister Lalrinpuii chuan, ruihhlo donaah chhungkaw nute an pawimawh thu sawiin, mahni chhungkua hlamchhiah lo turin nute a chah.

Lalrinpuii chuan, "Ruihhlo dona atan nuho leh hmeichhiate hian mawhphurhna sang tak kan nei a, chhungkuaa ruihhlo ti an awm hian a tuar nasa ber chu nute kan ni tlangpui. Khawtlang leh kohhranah theihtawpin kan inhmang a nih pawhin mahni chhungkua hlamchhiah lo ila, engkim bul inṭanna chu chhungkua a nih tlat avangin nute hian chhungkuaa kan tih tur leh mawhphurhnate hlen chhuah tum ṭheuh ang u," a ti.

Ruihhlo ti mekte leh la ti ve lote vennaah inzirtirna ṭha kalpui nasat a ṭul thu sawiin Minister chuan, "Mi tin hian ruihhlo kan do ta niin a hriat a, sorkar pawhin theihtawpa hma la chho zel. Ruihhlo ngai khawlaia tei rawlai hote enkawlna hmun tur ‘Hulhliap- Short Stay Centre’ din tumin chak takin hma kan la mek a ni," a ti a; mahni theihna zawnah hma la ṭheuh turin MHIP member-te a sáwm.

Aizawl bawrhsap Lalhriatpuia, Aizawl District Nasha Mukt Bharat Abhiyaan chairman ni bawk pawhin thu sawiin, ruihhlo ti ngai lo chhungkua pawhin ruihhlo ṭhat lohzia an inzirtir tam a pawimawh thu a sawi a, "Inzirtirna atan hian chhungkuaa nute hian mawhphurhna sang tak in nei a ni," a ti.

Aizawl DC hian nute chu an fate mizia leh ngainat zawng hre bertu an nih angin an fate nungchang zir chiang tur leh, ruihhlo laka an fihlim theih nan theihtawp chhuah turin a chah a ni.

Ruihhlo do chungchang zirhona hi MHIP, Ṭhuampui Branch huam chhunga nute pual a ni a, MHIP Gen. Hqrs vice president Ngurmawii'n kaihruaiin, Mizoram Social Defence & Rehabilitation Board mithiamte'n ruihhlo chungchanga hriat tur pawimawhte an zirtir. A thlawna inentir buatsaih nghal a ni a, Ṭhuampui Branch MHIP member eng emaw zat hriselna dinhmun enfiah a ni.

INZIRTIRNAA TARLAN ṬHENKHAT

• Ministry of Social Justice & Empowerment leh AIIMS, New Delhi ṭang dunin kum 2019 khan India ram puma ruihhlo hmansual dan zirchianna ‘Magnitude of substance use in India 2019’ a nei. Zirchiannaa a lan danin, Mizoram chu India ram pumah opiods kaihhnawih (heroin, etc.) hmansualah a sang ber.

• Ministry of Social Justice & Empowerment chuan National Survey aṭanga India ram puma ruihhlo hman sual hluarna bik district 272-ah Nasha Mukt Bharat Abhiyaan (Drug free India Campaign) a kalpui mek.

• Campaign thawh khatna (Phase I)-ah Mizorama district pathum - Aizawl, Champhai leh Kolasib district-ahte campaign kalpui a ni.

• Phase II-ah district 100 tihbelh a ni a, Mizorama district zawng zawng a huam. Nasha Mukt Bharat Abhiyaan hi India ram puma district 372-ah kalpui mek a ni.