Mamit DC-in Zomuantlang leh Tripura a tlawh

5th IR battalion constable pa­hnih kut tawrhna hmun Zomuan­tlang khua chu April 21, Thawhlehni khan Mamit DC Dr Lalrozama leh district thuneitute'n an tlawh a; khawtlang hruaitute kâwmin, harsatna an neihte an sawipui a, buhfai leh dailuah eng emaw zat an pe nghal.

Dr Lalrozama chuan, police duty pahnihte'n Chakma-te kut an tuar chu pawi a tih thu sawiin, "Khawvel pum hri léng buaia a buai laia hnam leh hnam, chi leh chi inkara buaina chawh chhuah hun a ni lo. India ram chhunga chêng, eng hnam pawhin natna hi ṭhahnem­ngai leh inthurual taka kan do tlan a pawimawh," a ti a; ramria force mi duty-te leh tlawmngaia thawk chhuakte chungah lawmthu a sawi.

Mamit DC hian Tripura state chhunga Kawnpui-I khuaa Anil Chakma in kâng chu an tlawh nghal a, Tripura sorkar aṭangin North Tripura SP aiawhin Francis Darlong-in a lo dawngsawng. Tripura police official-te sawi danin, Anil Chakma te chhungkua chu an in a kan laiin inah an awm lo a, rama an riah lai a ni a, in kan chhan hriat chian a la ni lo a, Tripura police-in an chhui mek. Mamit DC chuan, thubuai ziak lut a, in chu hâl luih a nih chuan a hâltute a rang lama man turin Tripura police hotute a ngen a ni.

State pahnih sorkar official-te chuan, Covid-19 léng karah hnam thil ang zawnga hmehbel a, social media-a thu zîktluak lo thehdarh chíng an awm ṭhin chu pawi an tih thu an sawi. Mamit SP chuan, Tripura police thuneitute chu social media account-a thu dik zîktluak lo thehdarhtute man a, hrem turin a ngen a ni.

Zomuantlangah hian boruak duhawm lo thleng zui a awm lo a, state pahnih ramrî-ah Mizoram leh Tripura aṭangin police an duty mek tih Mizoram sorkar thuchhuah chuan a tarlang.