Zirlaibu thar siam dan tur zirho a ni

State Council of Educational Research and Training (SCERT) chuan nimin khan an auditorium-ah kum 2026-27 academic session aṭanga zirlaibu thar hman tur buatsaihna chungchang zirhona an buatsaih a; SCERT director Caroline Zoramthangi'n a hawng.

'Workshop to Contextualise & Revise Elementary School Textbook for the Academic Session of 2026-2027' ah hian sikul zirlaibu hrang hrang - English, Hindi, Mizo, Social Science, Environmental Studies, Mathematics leh Science Textbook Committee member-te an tel a; June 13, 2025 thleng neih a ni ang.

Caroline Zoramthangi chuan, National Education Policy (NEP) 2020 hman mek hrin chhuah pawimawh tak chu National Curriculum Framework (NCF) 2023 a nih thu a sawi a, "NCF 2023 hian curriculum leh syllabus thar a hring leh a, Mizoram chuan curriculum leh syllabus milin kum 2026-27 academic session-a hman ṭan tur zirlaibu thar kan buatsaih a ngai ta a ni," a ti.

Zirlaibu thar buatsaih tura kaihruaitu tur (guiding principles) chu - curricular goals, competencies leh learning outcomes a la ni reng dawn tih sawiin Director chuan, "NCERT textbook kan hman avangin paih leh belh ngai kan tihte en chung zelin kan state mil, kan culture mil zirlaibu ṭha tak kan siam chhuah ngei ka beisei," a ti a; zirlaibu buatsaihtu tur mithiamte chu an ngaihtuahnate ram leh hnam tan ṭhahnemngai taka hmanga thawk turin a chah.

Caroline Zoramthangi chuan, National Council of Educational Research and Training (NCERT) textbook tharte chu Mizoram mila siam rem (contextualisation & adaptation) turin SCERT-in phalna felfai tak a neih thu a sawi a, "Tun ṭumah hian pawl 1, 2, 3 leh pawl 6 zirlaibute chu siamrem a, kum 2026-27 aṭanga hman ṭan tur a ni a. Mizo leh Hindi subject erawh chu textbook hman laite ennawnin, NEP 2020 leh NCF-SE 2023 zulzuia dah belh ngai leh siamrem ngaite siamrem tura buatsaih a ni," a ti.