Crop insurance-a loneitute tum tur state sorkarin a tumsak ṭhen dawn

Chief minister Lalduhoma hoin nimin khan sorkar hotute'n khuarel chhiatna leh hrik/hri vanga thlai chhiate insurance tih theihna, Pradhan Mantri Fasal Bima Yojana (PMFBY) 2025-26 chungchang an sawiho a; insurance tihna atana loneitute pawisa chawi ve tur zinga eng emaw zat chu Mizoram sorkarin a peksak turin an rel.

PMFBY kalphungah central tum tur, state sorkar tum tur leh loneitute tum ve turte a awm a; nimina ṭhutkhawmah hian, loneitute'n pawisa an pek ve tur chhâwk zângkhai dan tur rêlin, Mizoram sorkarin loneitute (crop insurance) premium pek ve tur chu ṭhahnem tak tumsak an rel a ni.

Mizoram sorkarin crop insurance atana loneitute hnena pawisa a pek turah bawhzui ngaite bawhzui nghal tura tih a ni a, Crop Insurance Scheme 2025-26 chu puan chhuah thuai a ni ang.

Tarlan danin, insurance leina man (premium rate) chu fûr thlai (cereals & pulses)-ah 2% leh commercial crop-ah 5% a ni a, thlasik thlaiah chuan cereals & pulses-ah 1.5% leh commercial crop-ah 5% a ni. Horticulture crop dangte a awm bawk.

PMFBY hnuaia crop insurance hi season khat chhung zel atan a ni a; kumin hian India laipui hnuaia agriculture insurance company-te nen hmalakho ṭha an tih thu an sawi.