Provisional adhoc status-a hlângkai turin sorkar ngen

Provisional Adhoc School Union (Provisional Adhoc HSS Association leh Provisional Adhoc School Association) chuan thuchhuah siamin, June 2025 chhung ngeia provisional adhoc status-a an thawhna sikulte hlângkai turin sorkar an ngen.

Provisional Adhoc School Union (PASU) chuan, provisional adhoc status-a an thawhna sikulte hlànkai an nih theihna tura rim taka kum khat leh a chanve chhung hma laksaktu Chief Minister, Education Minister leh department official-te chunga an lawmthu an sawi a, "Anni zarah hian rules leh thil ṭul dang pawh peih a lo ni ta hi kan lawm hle," an ti.

PASU chuan, provisional adhoc status-a hlankai tur sikulte chuan a tak thlen hun ṭawngṭaina nen an nghak tih tarlangin, "Sorkar thuchhuak chu kan tan thih leh dam kar thu ang a ni. Thawktute hi kum thuah pawh upa tawh tak tak leh pension hnaih tawh tak takte pawh kan ni ve nuk hlawm," an ti a, an tan sorkar thuchhuak a pawimawh tak zet thu an tarlang.

An member-te sikul zinga a tam ber chu khawtlang ṭangrualin an din a nih thu leh thingtlanga mirethei tê tête'n mahni khawtuala tlawm zawk lehkha an zir theihna a nih thu tarlangin PASU chuan, "Kum tam fê khawtlang mipui châwm a, lawmman tlemtê tê laa hna dang zawng loa khawtlang hmasawn duhna avanga inpea thawk kan ni," an ti.

PASU chuan, notification tihchhuah a nih theihna turin engkim peih a ni tawha an hriat thu tarlangin, "Cabinet meeting-in a pawm tawh ang ngeia buaipui ngai buaipui zawh a nih hnuah pawh notification chhuah a la ni lo fo hi hriatthiam har kan ti hle a ni," an ti a; a rang thei ang bera notification tichhuak turin sorkar an ngen a ni.