Thawhhona hmangin 'Better Mizoram' siam kan tum - Cooperation Minister

Mizoram State Cooperative Marketing and Consumers Federation Ltd. (MIZOFED) chuan nimin khan Synod Conference Centre-ah Annual General Assembly vawi 27-na an hmang a, Cooperation minister PC Vanlalruata'n a hmanpui. Minister chuan, thawhhona (cooperative) hmangin Mizoram chu 'Better Mizoram'-ah siam an tum thu a sawi.

MIZOFED hi kum 1981-ah din a ni a; Annual Report 2024-25-a tarlan danin, Mizoram hmun hrang hranga an petrol pump 10 aṭangin kum 2024-25 khan cheng nuai 26,272 an hmu a, LPG hmanga an sumdawnna branch/showroom paruk aṭangin nuai 4,378 leh essential commodities & consumer goods aṭangin nuai 2,050.56 an hmu bawk.

PC Vanlalruata chuan, sorkarin cooperative movement a ngaih pawimawh thu sawiin, "Kan ngaih pawimawh chhan chu mipuite'n kan thawhhona aṭanga sum lak luh an neihte leh hmasawnna tluantling hrang hrang a awm ṭhin hi a ni a, kan ramin kan hlawkpui em em. Kumin 2025 hi International Year of Cooperative (IYC)-ah puan a ni a, thupui chu 'Cooperatives build a better world' tih a ni. IYC 2025 puan a nih avangin cooperative hmangin Mizoram pawh better Mizorama siam kan tum," a ti.

ZPM sorkarin Bána Kaih (Handholding) scheme a ngaih pawimawh nih thu sawiin Minister chuan, "Bána Kaih hnuaiah hian bána kaih ngaite kaih kan tum," a ti a; MIZOFED-a affiliated primary society 300 chuang awm zingah bána kaih ngai an awm leh awm loh ngaihven turin hruaitute a chah.

Cooperation Minister chuan, Mizote chu NGO leh kohhranah an thawhho thiam em em laiin, society-ah erawh an thawkho thiam lo ṭhina a hriat thu a sawi a, "Hma kan la chho zel ang a, ṭhangtharte leh lehkha thiam zawkte cooperative movement-ah kan hnuh luh zel chuan hma kan la sawn em em ang," a ti.

Inkhawmpui hi MIZOFED chairman K Rothangpuia'n a kaihruai a, khualzahawm John LT Sanga, Cooperative Societies registrar pawhin thu a sawi. Chawhnuah rorel inkhawm neih a ni.