KHAWTHLIR

YMA-in thisen pe

YMA, Zotlang Branch chuan YMA Day pualin nimin khan an vengah thisen pek an huaihawt a, mi 42-in Civil Hospital, Aizawl tan thisen an pe a, mipa 32 leh hmeichhia 10 an ni.

Electric connection endik mek

Power & Electricity department chuan June 9, 2025 khan district khawpui tinah electric connection endik rûnpui an ṭan a; district khawpui aṭanga ṭanin, khaw tinah an endik dawn. PE department chuan, electric energy meter kaltlang loa electric hman leh electric hrui aṭanga pawh rûkte chu dan kalh a nih thu a tarlang a; dan loa electric hmang lo turin mipui an ngen.

Chhawmdawlna pe

Mizo Society of America (MSA), Maryland Branch chuan tun hnaia Mizorama ruahsur nasa vanga chhiatna tuarte chhawmdawlna atan nimin khan Central YMA hnenah Rs 3,41,000 an pe. Ṭanpuina sum hi CYMA pisaah MSA aiawhte'n CYMA president Lalhmachhuana an hlan a ni.

Serthlum ṭiak sem

Champhai North bialtu MLA H Ginzalala chuan nimin khan a bial chhunga Hnahlan, Vapàr, Rabung, Tualcheng, Selàm, Lungphunlian leh Ngàizawl khuaa loneitute tan serthlum ṭiak 28,000 a sem a; mithiamte'n a phun dan leh enkawl dan an zirtir nghal a ni.

Governor leh CM Award sawiho

Nimin khan chief minister Lalduhoma hoin CM conference hall-ah The Mizoram (Grant of Governor's Award) Scheme 2025 leh The Mizoram (Grant of Chief Minister's Excellence Award) Scheme 2025 chungchang sawiho a ni a, Home minister K Sapdanga leh official pawimawhte an tel. Governor Award hi Republic Day-a sem tur leh Chief Minister Award hi Chapchar Kûta sem tura ruahman a ni. Chief Minister Award hi civilian award anga kalpui a ni ang a, Governor Award hi sorkar hnathawkte pual a ni thung ang. Kalphung tur chipchiar chu la siam leh tur a ni a, tihfel thuai beisei a ni.