Modi kaihhruai sorkar kum 11 tlin pualin BJP-in exhibition buatsaih

Prime minister Narendra Modi kaihhruai sorkarin kum 11 a tlin (11th Years of Modi Govern-ment) lawmna kal zelah BJP, Mizoram Pradesh chuan exhibition an buatsaih a, BJP national secretary leh national spokesperson Anil Antony-a'n a hawng.

Anil Antony chuan, Narendra Modi kaihhruaina hnuaia BJP/NDA sorkar kum 11 chhungin India ramin nasa takin hma a sawn thu a sawi a, "Khawvela economy ṭha berte zingah kan lang phak ta a, Defence-ah pawh India chuan nasa takin hma kan sawn. India ramah Swachh Bharat Mission kalpui niin, India ram hmun hrang hrang tun hmaa bawlhhlawh tak ni ṭhinte a fai chho mek a, inthiarna nei lote saksak an ni," a ti.

Narendra Modi sorkar chu eirukna leh hlemhletnaah a fihlim nia sawiin Antony chuan, "State hrang hrangah pawh Pu Modi-a sorkar hmalakna thar Direct Benefit Transfer avangin corruption kawng laka awm ṭhin pawh tihreh a ni ta," a ti a; June thla chhung zawnga neih tur Exibition chu Mizoram mipuite'n tlawh ngei se a duh thu a sawi.

Mizoram BJP president Vanlalhmuaka pawhin thu sawiin, Exibition chu Mizo mipui tana tlawh turin chawhma dar 10 aṭanga tlai dar 4 inkarah hawn ṭhin a ni dawn tih a sawi a, "Exibition-ah hian Pu Narendra Modi-a kaihhruai kum 11 chhunga hnathawhte tarlan a ni," a ti.