Mizoram Scholarship Board-in scholarship an sawifiah
Mizoram Scholarship Board (MSB) chuan nimin khan pre-matric scholarship leh post-matric scholarship pek chhuah chungchang a sawifiah a; "Covid-19 hri léngin nunphung leh khawsak a tihdanglam vanga zirlai, ram páwna awmte'n harsatna nasa tak an tâwk hi Mizoram sorkar leh MSB chuan pawi a ti tak zet," a ti.
MSB tarlan danin, kum 2017 aṭangin Ministry of Tribal Affairs-in pre-matric leh post-matric scholarship pek chhuah dan a tidanglam a, scholarship sum kum khat chhung mamawh pek ṭhin chu kum 2017 aṭang chuan instalment-a pek a ni. First instalment-ah mamawh chanve pek a ni a, first instalment hman zawhna utilisation certificate leh statement of expenditure thehluh hnuah second instalment pek a ni ṭhin. Kum 2019-ah chuan second instalment chu May thlaah hmuh a ni.
Kuminah chuan first instalment cheng nuai 2227.53 chu Ministry of Tribal Affairs aṭangin hmuh a ni tawh a, chu chu Mizorama HSSLC, college zawng zawng leh zirna-in
ṭhenkhat, a daih chinte chu February 2020-ah pek chhuah a ni. Second instalment nuai 2267.62 chu Central aṭangin March thlaah dawn hman beisei ni mah se, inkhârkhip vangin rawn Central-in a pe chhuak lo.
Second instalment aṭanga pek tura tih zingah Mizoram páwna zirlai te, RIPANS, IGNOU, ZMC, computer institution hrang hrang, IASE, SCERT, NIELIT, nursing institution-te leh DIET-a zirlaite an tel.
Scholarship chungchangah hian Higher & Technical Education minister Dr R Lalthangliana'n nimin khan MSB hotute leh HTE officer-te meeting a neihpui tih tarlangin MSB chuan, "Minister hian Ministry of Tribal Affairs hotute phone-in a be nghal a, zirlai harsatna tâwkte ngai pawimawha a hma thei ang bera pe turin a ngen a, hun rei lo te chhungin sanction hmuh theih beisei a ni," a ti.