Sikkim-ah Complete lockdown kalpui chhunzawm

Sikkim sorkar chuan May 3 thleng an state-ah inkharkhipna pumhlum, complete lockdown chu kalpui chhunzawm zel a ni dawn tih a sawi. 

Lockdown pawhsei a nih hnuah Sikkim sorkar chuan April 20 aṭang khan khuahkhirhna ṭhenkhat a thlahdul a ni. Mahse Thawh­lehni khan chief minister PS Golay hoin emergency meeting neih a ni a, India ramah Covid-19 kai an pun belh zel avangin an state-a inkharkhipna hman mek chu May 3 thleng khauh zawka kalpui leh an rel a ni. 

Chief minister chaun district thuneitute leh police-te hnenah, khuahkhirhna ṭhenkhat thlahdul a nih hmaa an kal dan ang khan khauh taka kalpui leh turin a hriattir a, hemi rual hian MGNREGGA, agriculture  leh phalna pek bikte erawh hna thawh chhunzawm phalsak an ni thung. 

State sorkar chuan May 3 hmain an awm zel dan tur an la ngaihtuah leh dawn tih a sawi. Hemi hma chuan mipui mamawh phurtu tih loh motor dangte chu state pawn lam aṭanga luh khap an la ni ang. Office zawng zawng pawh khar chhunzawm tura tih a ni bawk. 

May 3-a ram puma lockdown puan a zawh hnua hma lak dan turte meeting-ah an rel nghal a ni.