Kumtling lo khuaikhema puh Lalrampana CBI-in an man

Central Bureau of Investigation (CBI) chuan tun hnai khan mipat hmeichhiat lam hawia kumtling lo khuaikhemtu leh Child Sexual Abuse Material (CSAM) nei leh thehdarha puhna thubuai an ziak lut a, mawhphurtua puh Lalrampana (22) s/o Mangkaithanga, Edenthar Veng, Aizawl an man.

CBI tarlan danin, May 30, 2025 khan an mi puh lakah thubuai an ziak lut a; mipat hmeichhiat lam hawia kumtling lote thlalak leh video siam, lak khawm, kawl leh internet-a dah (upload)-a puh a ni. Mipat hmeichhiat lam hawia kumtling lote khawsa lai video kawlah puh a ni bawk.

CBI mi leh sate chuan Lalrampana chenna in chu June 4, 2025 khan an dap; electronic device hrang hrang an man. Forensic endikna aṭangin thlalak leh video mawi lo tak tak awmna, CSAM tam tham tak hmuh chhuah a ni.

An thil mante chu INTERPOL International Child Sexual Exploitation (ICSE) database aṭanga data leh Google-a Cyber Tipline Reports (CTRs)-te nen finfiah a ni a; Indian Cyber Crime Coordination Centre (I4C), Ministry of Home Affairs hnenah pawh hriattir a ni.

Forensic zirchianna aṭangin Lalrampana hian Aizawlah naupang a khuaikhem ngei tih tarlan a ni. CBI chuan chak taka hma la nghalin, an mi puh nihna leh awmna hi hre chhuak thuaiin, naupang pawh an chhan chhuak. An chhui chianna aṭangin Lalrampana'n CSAM siamna atan naupang a vau tih an hre chhuak bawk. CBI inrawlh hma hian naupang leh a chhungte'n thuneitute hnenah an thlen lo thung.

Edenthar Veng aṭanga thu dawn danin, Lalrampana hi Edenthar Vengah mi in luaha awm an ni a, tun hma chuan taxi a khalh ṭhin a, tunah chuan hnathawh mumal a neih hriat a ni lo.