CYMA-in YMA Day pualin thilpek an sem

Central YMA chuan YMA Day vawi 91-na pualin nimin khan Mizorama damdawi-in leh home/centre hrang hrang leh Mizoram pawna Mizo welfare-te hnenah thilpek an sem.

CYMA hian India ram khawpui hrang hranga Mizo welfare 17 hnenah YMA Day chibai bûkna Rs 15,000 ṭheuh an pe a; Aizawla sorkar leh kohhran damdawi-in paruk hnenah Rs 15,000 ṭheuh an hlan. Nimin khan Ṭawngtai Bethel Camping Centre, OKM Home leh Thutak Nunpuitu Team (TNT) hnenah buhfai ip 50 ṭheuh an hlan bawk.

Kumin YMA Day hi Pathianni a nih avangin CYMA chuan mahni remchan angin June 14, Inrinni emaw, June 16, Thawhṭanni emawah hmang mai turin hriattirna YMA sub-headquarters, group leh branch-te hnenah a tichhuak a; YMA Day hi CYMA hruaitute'n hmun hrang hrangah an hmanpui dawn.

CYMA chuan YMA Day vawi 91-na hlim tak leh tluang taka hmang turin YMA branch leh member-te duhsakna a hlan a; YMA chu tlawmngai pawl, ṭanpui ngaite ṭanpuitu a nih angin YMA Day pualin mahni huam chhung ṭheuhah chanhai leh riangvaite ṭanpui a, mi dang tana ke pên chhuak turin YMA-te an ngen a ni.