Lunglei district chhunga khaw tinah JJM hnuaiah tui connection pe tawh

Lunglei District Water & Sanitation Mission chu an chairman Navneet Mann, bawrhsap hoin DC conference hall-ah an ṭhu a; Jal Jeevan Mission (JJM) leh Swachh Bharat Mission - Grameen (SBM-G) hnuaia hmalakna leh hmachhawpte an thlirho. JJM hnuaiah Lunglei district khaw 101-a chhungkaw tin hnenah tui connection pek a ni tawh tih tarlan a ni.

Tarlan danin, JJM hnuaiah hian Lunglei district-ah water supply scheme 150 awmin, thawh zawh vek a ni tawh a; Lunglei district-a thingtlang khua 101 awmah in tinah tui connection pek tawh niin, Har Ghar Jal (HGJ) village a ni vek tawh. Lunglei district-a sikul 359 leh anganwadi centre 238-ah JJM kaltlangin tui herh haw mai theihna (tap water connection) siam vek a ni tawh bawk.

Ṭhutkhawmah hian, UDISE+ leh Poshan Tracker portal-ahte tui connection pek zat data dik tarlang tura hmalak ni se, an ti. Lunglei district-a HGJ khaw tinah anmahnia tui thianghlim dan an lo endik theihna tur, field test kit (FTK) pek a nih tawh thu leh, khaw tinah FTK hman dan thiam hmeichhia (FTK trained woman) an awm vek tawh thu an sawi.

SBM-G hnuaiah hian Lunglei district-ah bawlhhlawh dah ṭawihna khur (compost pit) 392, tuichhe paihna khur (soak pit) 450 leh vantlang inthiarna (community sanitary complex) 21 siam zawh a ni tawh tih tarlan a ni. SBM-G hnuaiah kum 2024-25 chhungin mimal inthiarna êk-in (individual household latrine) 300 sak zawh a nih thu leh, kum 2025-26 chhungin 200 sak tum a nih thu tarlan a ni bawk.