GST registration certificate dawra târ vek turin hriattir

Siaha Zone deputy commissioner of state tax H Vabeitha chuan hriattirna tichhuakin, Siaha district-a Goods & Services Tax (GST) registration nei sumdawngte chu an dawr chhung hmun langsar laiah GST registration certificate târ vek turin a hriattir.

H Vabeitha chuan hriattirna zâwm ṭheuh turin sumdawngte a chah a, "Mizoram GST Rules, 2017 Rule 18-in a sawi angin GST registration certificate hi dawr chhung langsar laiah târ ngei tur a ni a, GSTIN (registration number) hi dawr signboard-ah a chuang ngei tur a ni. Tar chhuak lote chu MGST Act, 2017 Section 125 hmanga hrem an ni ang," a ti.

Bungraw hralh chhuahah GST invoice pek ngei tur a nih thu tarlangin H Vabeitha chuan, invoice pe lote chu MGST Act, 2017 Section 122 hmanga hrem theih an nih thu a tarlang bawk.