KHAWTHLIR

Computer 20 pe

Mizoram Rural Bank chuan Central YMA Computer Centre-a hman atan nimin khan CYMA hnenah computer 20 an pe. MRB hian corporate social responsibility hmangin CYMA Computer Centre-a hman tur computer-te an lei a, nimin khan CYMA hruaitute hnenah an hlan a ni.

Mamitah veng fai intihsiakna hawng

Mamit bawrhsap K Laltlawmlova chuan nimin khan Mamit khawpuia veng fai intihsiakna, Clean Ward, Green Ward Competition a hawng. Bawrhsap chuan, veng fai ber nih tuma inelna thianghlim nen ṭan la ṭheuh turin VC-te a chah. Intihsiakna hi ni 21 chhung awh tur a ni a, tehna hrang hrang 11 hmangin vengte endik a ni ang. Pakhatnain Rs 30,000, pahnihnain Rs 20,000 leh pathumnain Rs 10,000 an dawng dawn a ni.

HMV tlan phal lo

Kawnpui leh Sairang inkar NH kawngpui siam mek chungchangah Kolasib SP David H Lalthangliana chuan thupek a chhuah a; chak zawka kawng siam a nih theih nan zing dar 9 aṭanga tlai dar 5 thleng lirthei lian (HMV) tan tlan phal a nih loh thu a tarlang. Thupek hian thla khat chhung a awm dawn a, thupek zawm lote chu MV Act Section 177 & 179 hmanga hrem theih an ni.

Kawng khâr dawn

Vawiin hian Bawngkawn leh Sairang NH kawngpui, Chaltlang Lily Veng huam chhunga 407 truck leh tipper dinna (stand) inkara lung tla then a ni dawn a; hei vang hian chawhma dar 11 aṭanga tlai dar 4 thleng kawngpui khâr a ni dawn. Vawiinah hna thawh zawh hman a nih loh chuan naktukah thawh chhunzawm a ni dawn a, kawng khâr leh a ni ang.

Sorkar pisate mipui tan inhawng dawn

Hnahthial bawrhsap K Vanlalruati kaihhruaiin nimin khan tribal mipui tana duan PM-DAJGUA leh PM-JANMAN puala mipui harsatna chinfelna hun hman dan tur rel a ni. June 17, 2025 khian Hnahthial Bazar kâwnah sorkar pisa hrang hrangte chawhma 10 leh chawhnu dar 2 inkarah mipui dawr theih tura inchhawp chhuah ni se, an ti.