Corporation-a Power department let turin chak taka hmalak rêl

Power & Electricity department hotute an minister F Rodingliana hoa June 12, Ningani tlaia a pisaa ṭhukhawm chuan, PE department hmasawnna atan corporation-a let turin chak taka hmalak an rêl.

F Rodingliana chuan, inrêlbâwlna ṭha zawk a awm theihna atana corporatization kalpui chu ZPM manisfesto zinga mi a nih thu sawiin, "Hei hian mipui leh sorkar tan kalphung ṭha zawk a thlen dawn," a ti a, hmalakna chak taka bawhzui turin department officer-te a chah.

Ṭhutkhawmah hian sorkar laipuia Ministry of Power-in state power department-te corporatize dan tur inkaihhruaina (guideline) a siamte thlirho a ni a; chumi zûlzuia unbundling leh corporatization kalpui dan tur ruahman a ni.

Power department hotute ruahmanna ang chuan unbundling tih hmasak tur niin, PE department chu ṭhuang thum - generation, transmission leh distribution-ahte ṭhen tur a ni a; chu'ng strategic business unit (SBU) hrang hrangte hian anmahni chanpual ṭheuh an enkawlin an thawk tawh ang.

SBU milin department restructuring pawh kalpui tura rel a ni a, a theih ang angin outsourcing leh franchising pawh nasa zawk a kalpui nghal tum a ni.

Ṭhutkhawma tarlan danin, ruahmanna hi sorkar laipui duh dan leh Electricity Act, 2003-in a sawi anga siam niin, hnathawh tur bik chang tura insiam thar a nih chuan SBU hrang hrangte chu anmahni hna ṭheuhah an insáwr bing thei dawn a, inrelbawlna ṭha zawk neiin mipui tan service ṭha zawka hna thawk thei tura ngaih a ni. Chutiang a nih chuan ATC loss (kawlphetha bothlau) pawh tlahniam thei tura beisei a ni bawk.