DCMA Minister-in hun rei lote chhunga LADC-a CEM panga awm veiawm a ti

District Council & Minority Affairs (DCMA) minister C Lalsawivunga chuan nimin khan Lai Autonomous District Council a tlawh a; LADC hotute nen an inkawmnaah, hun rei lo te chhunga LADC-ah chief executive member (CEM) panga lai an awm hman chu veiawm a tih thu a sawi.

DCMA Minister hi LADC CEM N Zangura, chairman T Zakunga leh hotu dangte nen an inkâwm a; hun rei lo te chhunga LADC-ah CEM panga an awm hman chu veiawm a tih thu sawiin, anmahni thlang tlingtu mipui zahawmna hriaa mahni inenfiah thar turin MDC-te a chah.

Sorkar ngêlnghet tak siam turin mipuiin an aiawha an thlante an pawimawh thu sawiin C Lalsawivunga chuan, "LADC-a sorkar nghet tak siam turin rilru thar put a ṭul a, insiam ṭhat nan hun a la tlai lo," a ti a, rinawmna leh dikna a taka nun chhuahpui tur leh, Lawngtlai district mipui tan theihtawp chhuah chhunzawm zel turin MDC-te a sáwm.

C Lalsawivunga chuan, LADC buai vanga mipuiin harsatna an tawh mek state sorkarin a hriatpui thu sawiin, "Mizoram sorkarin Lawngtlai district mipui tan theihtawp a chhuah reng a, tun dinhmunah Lawngtlai Treasury-ah LADC sum cheng vbc. 30 vel a awm tawh a, LADC-in budget an pass theih loh vanga lak chhuah mai theih a ni lo," a ti a, pawi a tih thu a sawi.

DCMA Minister chuan, Chief Minister-in a sawi tawh angin, district council-te'n direct funding an hmuh theih nan leh 10th Schedule (Anti Defection Law) hman chungchangah Mizoram sorkarin sorkar laipuia recommend a pek tawh thu a sawi bawk.