World Blood Donor Day hman a ni; Thisen pe ṭhate chawimawina hlan a ni

Vawiin hi thisen petute ní, World Blood Donor day a ni a; nimin khan Mizoram hmun hrang hrangah hman niin, thisen pe ṭhate hnenah chawimawina hlan a ni. Aizawlah chuan Dawrpui Multipurpose Hall-ah hman a ni a, minister of state B Lalchhanzova'n a hmanpui. Minister chuan, Mizo ṭhalaite chu thisen pek uar zel tur leh thisen an pek theih nan hriselna vawng uluk turin a chah.

Aizawla World Blood Donor Day hmannaa hi Association for Voluntary Blood Donation (AVBD) leh Mizoram State AIDS Control Society huaihawt a ni a; kumina thupui chu 'Give blood, give hope: Together we save lives' tih a ni.

B Lalchhanzova chuan, Mizoramin a thlawna thisen pekah hma a sawn zel chu ropui a tih thu leh thisen pe ṭhin zawng zawngte a chhuan thu sawiin, thisen lam buaipuitu AVBD hruaitu te, MSACS, blood bank-te leh Health department-a thawkte inpekna fakawm a tih thu a sawi a, "A thlawna thisen pek 93.71% lai kan kai ta hi a lawmawm a, 100% thlen tumin ṭan i la zel ang u," a ti.

Mizo ṭhalaite thisen pek uar zel tura chahin, "Thisen kan pek zel theih nan kan hriselna i vawng uluk ang u. Mizote kan dam rei tâwk lo a, dam rei turin ṭan la ila, a tlem berah kum 70 tal chu dam thlen tum ila, chutiang tur chuan hriselna kan ngaih pawimawh a ngai a, kan taksa kan vawn thianghlim a ṭul," a ti.

AVBD general secretary Lalrinkima kaihhruaiin April 2024 leh March 2025 inkara Mizorama pawl hminga thisen pe ṭhate hnenah lawmman hlan a ni a; khuallian B Lalchhanzova leh AVBD adviser Lalbiakthanga Pachuau ten lawmman an hlan.

Sorkar kum liam ta chhunga Mizoram puma pawl hminga thisen pe tam ber chu National Service Scheme (NSS) an ni a; Kristian Ṭhalai Pawl (KṬP) pahnihna niin, Ṭhalai Kristian Pawl (ṬKP) pathumna an ni. Blood donation camp huaihawt ngun ber Hrangbana College hnenah Special Award hlan a ni.

World Blood Donor Day hmannaah hian MSACS project director Dr Jane Rinsangi Ralte-in inlawmna thu sawi pahin kum 2024-25 financial year chhunga thisen pek dinhmun tlangpui a sawi. Pawl hrang hrangte chu thisen pek uar zel tura sàwm rualin, ṭum khatah pek ṭheuh tum kher lo a, zing zawka blood donation camp huaihawt tum turin a chah a; Mizo ṭhalaite chu donation camp-ah chauh pe loa mahni chauh pawha uar zawka thisen pe ṭhin turin a ngen bawk.

Inkhawmah hian thisen unit 1,600 chuang dawng tawh Mimi Lalnunsiami leh Linda Lallawmawmi, Tachhip te unau aiawhin an nu-in testimony a sawi a; thisen petute aiawhin Dr Malsawmkima, Mission Vengin testimony a sawi thung.

April 2024 - March 2025 chhung khan Mizoramah thisen unit 34,752 pek a ni a, chung zinga unit 32,566 (93.71%) chu voluntary donation a ni. Mimala a thlawna thisen pek (individual voluntary donation) a pung zel a, kum liam taa pek zawng zawng unit 34,752 zinga unit 10,022 chu individual voluntary donation niin, petute chu mipa 8,480 leh hmeichhia 1,542 an ni. Thisen unit 100 aia tam pe pawl 29 an awm a ni.

World Blood Donor Day hi June 14 a ni a, Inrinni a nih avangin nimin khan hman a ni.