Zirlai chawimawina hun hmang

Minister of state Prof. Lalnilawma chuan nimin khan a bial chhunga Saitual College auditorium-ah MZP Headquarters, Saitualin HSLC leh HSSLC Examination 2025-a Saitual town area-a zirlai ti ṭhate chawimawina hun an buatsaih a hmanpui.

Saitual khawpui huam chhunga sikul hrang hrangaHSLC distinction-a pass mi paruk leh HSSLC first division-a pass mi 30 hnenah lawmpuina hlan a ni a, zirlai zawng zawng pass vekna Graceland Adventist School, Keifang leh tehna hrang hrang hmanga town chhung zirna-in ṭhaa thlan Saitual High School hnenah thilpek hlan a ni bawk.

Prof. Lalnilawma chuan, zirlai pass tharte an hlawhtlin theihna tura theihtawp chhuahtu zirtirtute a chhuan thu a sawi a, "Tunah hlawhtling mah u la, in hmabak a la ko hle a ni tih hria ang che u. In hun hman zelna turah harsatna tam tak in la hmachhawn dawn a, chutiang hunah chuan beidawng loin hma lam pan zel ang che u," a ti a; zirlaite chu central service, medical leh technical line lamah hlawhtling thei tura ṭan la turin a chah.

Chawimawina hunah hian Saitual DC Dr Lalngura Tlau leh MZP Gen. Hqrs president H Lalthianghlima te pawhin thu an sawi a ni.