2nd MAP firing range thar hawng

2nd Battalion MAP hmunpui, Lunglei Luangmuala silai kah zirna (firing range) thar chu nimin khan Inspector General of Police (Headquarters) H Ramthlengliana'n a hawng.

H Ramthlengliana chuan, 2nd MAP-in firing range thar ṭha tak an neih chu Mizoram Police tan leh mipui ralmuanna atana inzirna ṭanglai a nih theih nan duhsakna a hlan a; a hnung tawlh zawng ni lo, hmasawn zawnga kal zel tur te, rilru puthmang dik nei a, Mizoram leh hnam tana a ṭha lama hma hruaitu leh sûlsutu nih tum zel turin 2nd MAP mi leh sate a chah.

2nd MAP firing range hman ṭhin chu silai kaptute bawhna hmun zâwl zatve tih loh, target phunna leh hmunhma tam zawk chu mimal ram a nih avangin kum 30 chuang an hman hnuah hman zui a rem tawh lo a; chuvang chuan battalion lung lakna quarry ni ṭhin chu firing range atan siam a ni.