Rualbanlote electoral roll-ah kim taka an tel theih nan hmalak rêl

State Steering Committee on Accessible Elections (SSCAE) chu nimin khan chief electoral officer Dr Lalrozama kaihhruaiin an ṭhukhawm a; electoral roll-a la chuang lo rualbanlo - persons with disabilities (PwD)-te zawng chhuak tura hmalak an rêl.

SSCAE hi Election Commission of India thupek anga pianphunga rualbanlote awlsam zawka inthlanpui leh a kaihhnawih hmalaknaah kim taka an tel theih dan tur ngaihtuah tura din a ni.

Nimina ṭhutkhawmah hian, PwD-te'n harsatna nei loa vote an thlak theih nan vote thlakna hmun (polling station) atana hman hrang hrangah wheelchair-a kal theihna, tui thianghlim in tur, inthiarna mumal leh chawlh hahdamna tur remchang a awm vek theih nan a rang lama hmalak rel a ni. Polling station panna kawng ṭha leh PwD-te vote thlak tura an kalin lirthei an dahna tur mumal tak ngaihtuah ni se, an ti.

PwD kum 18 tling tawh zinga electoral roll-a la chuang lote zawn chhuah hna kalpui an rêl a; chumi atan chuan district tina Election department hnuaia din District Monitoring Committee on Accessible Election (DMCAE) chu District Level Disability Committee nen thawk dunin hma la tura tih a ni.

Electoral roll buatsaihnaah leh inthlan kaihhnawih hrang hrangah PwD-te puala hmalakna thawhpui turin district tinah PwD icon ruat an rel a; inthlan buaipuitute'n PwD-te mamawh an hriata an lo dawnsawn thiam zawk nan training mumal tak neih an rel bawk.