KHAWTHLIR

YMA-in thisen pe

YMA Day pualin nimin khan YMA branch pahnihin thisen an pe. YMA, Dawrpui Vengthar Branch-in Civil Hospital, Aizawl tan thisen unit 95 pein, petute hi mipa 89 leh hmeichhia paruk an ni a; YMA, Muallungthu Branch-in ZMCH tan unit 30 pein, petute mipa 25 leh hmeichhia panga an ni.

MHIP-in an dem

MHIP Gen. Hqrs. chuan thuchhuah siamin, CBI-in tun hnaia an man Lalrampana'n dan hnuaiah a phû tâwk hremna hmu ngei se an duh thu an tarlang. MHIP chuan, Lalrampana'n naupang kumtlinglo mawi lo taka a khawsakpui bakah, social media hmanga a pho lang chu an dem thu leh tun hnuah thleng tawh lo se an duh thu an tarlang bawk.

CADS ruihhlo man

Central YMA hnuaia ruihhlo donaa hma latu Central Anti Drug Squad chuan June 7-13, 2025 chhung khan heroin (no 4) hawng 65 leh Tictac bûr 67 an man a; ganja kg. 15 leh codein bûr 771 an man bawk. Ruihhlo kaihhnawihah hian mi 58 an man.

Hmalakna thlirho

Core Committee on Hulhliap Short Stay Centre chu nimin khan an chairman Malsawmzuala Ralte, Mizoram Youth Commission chairman kaihhruaiin Secretariat Conference Hall-ah an ṭhukhawm. Core Committee hnuaia task group paruk hmalaknate thlirho a ni a; Hulhliap Short Stay Centre buatsaihna tur hmun atan Synod Revival Camping Centre ruahman a ni.

Model JSS

Ministry of Skill Development and Entrepreneurship-in India rama Jan Shikshan Sansthan (JSS) 288 zinga Model JSS 30 a thlan zingah Mamit JSS a tel a; Mamit JSS hian sorkar laipui aṭangin Rs 9,83,246 man industrial sewing machine 30 leh computerized embroidery pariat an dawng. Mamit JSS hnuaiah hian skill training trade 12 awmin, kum 2023-24 khan zirlai 1,800-in training an zo a ni.

Tihdikna

Nimin June 13, 2025-a chhuak Vanglaini headline-a Mizoram sorkarin sawhthing a lei tawh zat quintal 17,80,120 tih chu tihsual palh a ni a, quintal 1,78,120 a ni zawk e.