Kan ram dinchhuah nan hmathlir fel tak neia hna thawh a ngai - CM

Chief minister Lalduhoma chuan, Mizoram siamṭha turin hnam dangte an rawn kal dawn lo tih sawiin, ram dinchhuahna atan YMA member-te'n hmathlir fel tak neia hna an thawh a ngaih thu a sawi.

CM Lalduhoma hian June 14, Inrinni khan YMA, Neihloh Branch-in YMA Day an lawmna a hmanpui a; ram leh hnam dinchhuahna atan thawh chhuah tam tak nei ram nih a ngaih thu sawiin, "Chu dinhmun thleng tur chuan YMA member-te'n hmathlir fel tak neia hna kan thawh a ngai. Kan ram siamṭha tur hian hnam dangte an rawn kal dawn lo a, kan tu leh fate rawn tih atana dah chi pawh a ni lo. Keini, tuna chhuan awm mekte hian thlentir i tum ang u," a ti.

YMA chu a din tirh aṭangin ṭanpui ngaite ṭanpuitu, Zo fate tana pawl ṭangkai a nih reng thu sawiin Lalduhoma chuan, "YMA hlutna hi a hniam thei lo. Mi ṭhenkhatte'n YMA ropuizia an la hmu fiah lo a nih chuan lungngaihna leh harsatna an tawh ní-ah an la hmu ang," a ti a; engtikah emaw chuan Mizo fate chu YMA-in a la tuamhlâwm dawn thu a sawi.

Chief Minister chuan, tun hnaiah ruahpui vangin chhiatna Mizoramin a tuar nasa tih sawiin, "Chhiatna a thlen apianga ṭanpuitu langsar ber chu YMA an ni. An ṭanpuina dawngtu, a bikin hnam dangte'n nasa takin an lawmna thu social media lamah an rawn pho chhuak a, Mizo min tihmingṭha em em a ni," a ti.

Serchhip Bialtu MLA chuan, Neihloh chu khaw lian ni lo mah se, a chhunga cheng mipui an inngeih avangin khaw nuam a nih thu sawiin, "A hmunhma hian duh thu a sâm lo a, a him tâwk lo a, a zauh hleih theih tawh bawk si loh. Khaw ram chhungah hian khaw thar kai mai u la a ṭhain ka ring," a ti a; sorkar nena ṭangruala ngaihtuahna thar sen ṭha a tih thu a sawi.

YMA, Neihloh Branch-ah hian member 262 an awm mek a ni.