YMA Day hlim taka lawm a ni

Nimin June 15 khan YMA Day vawi 91-na a ni a, Pathianni a nih avangin YMA branch tam tak chuan June 14, Inrinni khan hlim takin an lawm; vawiin leh tun kar chhoa lawm tur branch an awm nual bawk.

Kumina YMA Day hi kar liam ta tir lam aṭanga lawm te, June 13, Zirtawpni zan aṭanga lawmte an awm a, branch tam ber chuan Inrinni khan an lawm a ni. YMA Day hi khawtlang leh mi dang tana thil ṭha tihna hun atan leh, khua leh veng chhung intihhlimna atan hman a ni tlangpui.

YMA branch eng emaw zat chuan veng chhung leh thlanmualte an tifai a, ṭanpui ngaite an ṭanpui a; intihhlimna leh hnam lam chi hrang hrang entira hun hmang branch tam tak an awm. YMA Day lawmnaah hian nula leh tlangval, nu leh pate leh naupante'n hlim takin hun an hmangho a ni.

Central YMA hruaitute chuan branch hrang hrangah YMA Day an hmanpui a; president Lalhmachhuana'n Kawlkulh North, ITI Veng leh Chaltlang Lily Veng branch-ahte a hmanpui. Vice president Prof. Lalnuntluanga'n New Capital leh Tuikhuahtlang branch-ah, general secretary Prof. Malsawmliana'n Hortoki Joint YMA leh Vaivakawn Branch-ah, assistant secretary Fabian Lalfakawma'n Saipum leh Chawlhhmun branch-ah, treasurer Roneihthanga'n Nursery Veng leh Chhawrtui branch-ah, finance secretary MS Ralte-in Samlukhai leh Upper Republic branch-ahte an hmanpui bawk.

Kumina YMA Day hi minister, MLA leh politician-te'n hmun hrang hrangah an hmanpui a ni.