Peace city atan master plan kan siam thuai dawn - Duhoma

Chief minister Lalduhoma chuan, Thenzawl Peace City din an tumah master plan siam thuai a nih dawn thu a sawi.

June 14, Inrinnia YMA, Neihloh Branch-in YMA Day an lawmna a hmanpuinaah Chief Minister chuan, Thenzawl leh a chhehvel ram ṭhuta peace city din tuma hma an lak dan a sawi a, "Master plan kan siam thuai dawn a, a tak a chan hunah chuan in khawtlang hian in chhawr hle dawn a ni," a ti.

Sorkar thuchhuah tarlan danin, Aizawl khawpui tâwt tihziaawmna leh Mizoramin khawpui changkang zawk a neih theih nan Thenzawl rama sq.km. 108-a zauah Thenzawl Peace City din tum a ni a, khawpui chhung bik (urban area) chu sq.km 82 ni tura ruahman a ni.

Peace City master plan siam nan sorkar laipuiin cheng vbc. 10 (nuai 1,000) a pe dawn a, cheng nuai 100 a rawn pe tawh.

Master plan siam turin agency rintlak leh hmingṭha thlan tum a ni a, sorkar aṭanga peace city buaipuitu tur bik Special Purpose Vehicle din tum a ni bawk.