KHAWTHLIR

KṬP-in thisen pe

KṬP, Model Veng Branch chuan June 15, Inrinni khan World Blood Donor Day (June 14) pualin an kohhran hall-ah thisen pek an huaihawt a, Synod Hospital tan thisen unit 34 an pe a, petute mipa 31 leh hmeichhia pathum an ni.

Rualbanlote Ni

Mizoram Presbyterian Kohhran chuan nimin Pathianni khan Rualbanlote Ni an hmang a; tualchhung kohhrante'n an remchan dan angin an hmang. Rualbanlote Ni thupui atan Synod chuan 'Isua, rualbanlote lainata tidamtu' tih thupui an thlang. Rualbanlote Ni hi June thla Pathianni vawi thumnaah an hmang ṭhin a ni.

YMA lirthei hlan

Nidhi Creative Infrastructure chuan corporate social responsibility hmangin YMA, Lily Veng Branch hnenah Mahindra Bolero Pik-Up an pe a; bialtu MLA minister Vanlalhlana'n June 14, Inrinni khan a hlan.

Rêl lut turah inzirtirna buatsaih

June 14, Inrinni khan Sairangah VC huaihawtin vantlang inkhawm (gram sabha) neih a ni a; Sairang thlenga rêl lut tur kaihhnawiha mipui fimkhurna tur hrang hrang inhrilhfiahna, 'Railway Safety Awareness Campaign' neih a ni. Aizawl SDC Samuel Malsawmzuala, Sairang Police OC Lalngaihawma leh Railways engineeer pahnih - Partha Pratima Das leh Ganesh Langthasa ten thil pawimawhte an hrilhfiah.

Ṭanpuina hlan

YMA, Electric Veng Branch chuan YMA Day pualin nimin khan Samaritan Riangvai Rûn, Selingah ṭanpuina Rs 30,000 leh thawmhnaw ip hnih an hlan. Samaritan Riangvai Rûnah hian enkawl lai mi 55 an awm a, thawktu mi 10 nen an vaiin mi 65 an awm mek. Enkawl lai zinga mi 31 chu vohbik an ni.

UPSC exam tumte tan hun buatsaih

Mizoram Youth Commission leh Formosa Foundation chuan June 14, Inrinni khan zirlaite leh Union Public Service Commission hnuaia Civil Service Examination hmachhawn tumte tan Aijal Club-ah Ministry of Finance additional secretary Sajjan Singh Yadhav, IAS kawmna hun an buatsaih.