Mizo mipate kan harh thar a ṭul - Minister Lalnghinglova

Sports & Youth Services (SYS) minister Lalnghinglova Hmar chuan, tunlaiah Mizo ṭhalai zingah hmeichhia aiin mipa thi an tam thu sawiin, mipate an harh thar a ṭul thu leh, Mizote chu nasa zawka an pian pun a ngaih thu a sawi.

Lalnghinglova Hmar hian Inter Branch YMA Football Tournament 2025-a champion YMA, Republic Veng Branch-in June 14, Inrinnia champion an lawmnaah thu sawiin, tunlaia Mizo ṭhalai thi an tam chu a vei thu leh nupui pasal neih kawngah ṭhalaite an hawih harh a ṭul thu a sawi a ni.

Mihringte chu an dam rei zawngah thuneitu ni lo mah se, dam chen pawt tawitu an ni thei tih sawiin Lalnghinglova chuan, "Ruih theih thil tih nasat lutuk vang leh kan khawsak phung dik tawk lo vangte hian kan thi nasa lutuk a, kan harh thar a ngai. A bik takin mipate kan thi nasa lutuk a, mipa kan thih nasat chuan hmeithai an tam zel. Mizo kan awm zel theihna tur chuan kan dam rei a, kan pian pun a ngai a ni," a ti a; nupui pasal neih kawngah hawi harh turin Mizo ṭhalaite a chah.

Sports Minister chuan, infiamna chu eizawnna ṭha tak a nih tawh thu a sawi a, "Lehkhathiam hi eizawnna a ni a, zirna leh infiamna kal kawptir thiam a pawimawh. Thawk rim leh bei nasaah pawh Pathian au tamte'n malsawmna an dawng duh bik," a ti.

Mizote'n football-ah hma an sawn nasat thu sawiin Lalnghinglova chuan, "Football hi eizawnna tlak leh hausakpui tlak a ni a, mahse, talent nei ṭha zawng zawng an thleng sang chuang lo a, vanneih tel a ngai," a ti a; Indian Super League-ah Mizo tam ber lo deuh mah se, Mizo player-te khelh zat (minute) a tam ber thu leh, I League-ah chuan Mizote an sang lawr lak a, I-League 2-ah chuan pahnihna an nih thu a sawi.

Inkhawmah hian minister PC Vanlalruata, Rajya Sabha MP K Vanlalvena, AMC-a bialtu corporator David Zohmangaiha leh Central YMA president Lalhmachhuana te pawhin thu an sawi. YMA, Republic Veng Branch hian an venga zirlai ti ṭhate hnenah chawimawina an hlan nghal bawk.