CADC chief executive member paihthlak a ni

Nimina Chakma Autonomous District Council (CADC) Special Session-ah chief executive member (CEM) Molin Kumar Chakma rin tâwk lohna (no confidence motion) put luh a ni a, vote thlak a nih hnuah Molin Kumar Chakma chu CEM aṭanga paih a ni.

Special Session-ah hian ZPM member of district council (MDC) Doymoy Daveng Chakma-a'n no confidence motion a pu lut a; CEM Molin Kumar Chakma-a'n sorkarna chelh chhunzawm turin member a ngah tawk tawh lo a, hruaitu thlak a ngaih thu a sawi. Chumi hnuah CEM rin tâwk lohna motion sawihona a ni a, vote lak a ni.

Session-a tel elected MDC 17 zinga mi 15-in CEM Molin Kumar Chakma an thlâwp lo a, thlâwptu pakhat chauh a awm. MNF MDC neih chhun Rasik Mohan Chakma chuan vote a thlak lo a; BJP MDC pakhat Nirupam Chakma chu session-ah hian a tel lo bawk.

11th CADC-ah hian CEM atan Rasik Mohan Chakma lak luh a nih hnuah, February 27, 2025 khan Molin Kumar Chakma hian a thlak a ni.

CADC-ah hian thlan tlin member 20 an awm a, member pakhat thi ta aiawh tur thlan a la nih loh avangin tunah MDC 19 an awm. ZPM-in member 16 neiin, BJP-in MDC pahnih leh MNF-in MDC pakhat an nei mek a; BJP MDC 16-te'n tun hnai khan ZPM an zawm a ni.