Mizoram sorkar damdawi-in pariatin NQAS national certificate an hmu thar

India rama sorkar damdawi-in ṭha tehna, National Quality Assurance Standards (NQAS)-ah Mizorama damdawi-in pariat an tling thar a; heti hian Mizorama sorkar damdawi-in 29-in NQAS certification an hmu tawh.

NQAS certification hmu tharte chu primary health centre (PHC) paruk leh urban primary health centre (UPHC) pakhat an ni a; chu'ngte chu Kawnpui PHC, Pangzawl PHC, Chhingchhip PHC, Lungsen PHC, Cherhlun PHC, Sangau PHC, Chhuarlung (Chhaolo) PHC leh Hrangchalkawn UPHC te an ni.

National Health Mission, Mizoram tarlan danin, NQAS certification hmu thar damdawi-inte'n tehnaa an hmuh zat chu Pangzawl PHC-in 96.26%, Chhuarlung PHC-in 95.30%, Chhingchhip PHC-in 93.80%, Hrangchalkawn UPHC-in 93.35%, Kawnpui PHC-in 91.42%, Cherhlun PHC-in 89.66%, Sangau PHC-in 89.03% leh Lungsen PHC-in 88.22% a ni.

Heti hian Mizorama sorkar damdawi-inte zinga 29-in NQAS national certificate an nei tawh a; PHC bikah PHC 19-in hmu tawhin, UPHC pathumin an hmu tawh bawk. NQAS certification hmu tawh dangte chu district/civil hospital-te an ni hlawm.