CM-in PM-DAJGUA Awareness & Benefit Saturation Camp a hawng

Sorkar laipui ruahman, Prime Minister's Dharti Aaba Janatiya Gram Utkarsh Abhiyan (PM-DAJGUA) Awareness & Benefit Saturation Camp nimin khan Planning conference hall-ah buatsaih a ni a, chief minister Lalduhoma'n Planning conference hall-ah a hawng. CM chuan, PM-DAJGUA chu ṭha taka Mizorama tihlawhtling turin mawhphurhna nei zawng zawng a chah.

PM-DAJGUA hi sorkar laipui Ministry of Tribal Affairs hnuaia hnam hnuaihnungte leh ram leilung fa tribal-te dinhmun chawikanna tur leh sorkar scheme hrang hrang kalpuinaa a tlabal lai thawm ṭhat leh tihchangtlunna tura ruahman a ni a; Awareness & Benefit Saturation Camp hi June 15-30, 2025 chhung kalpui tur a ni.

CM Lalduhoma chuan, Mizorama cheng mipui zinga 94% chu tribal an nih thu a sawi a, "State dangah chuan tribal-te hi hnam tlem zawk an ni hlawm a, kan ramah chuan hnam tam zawk kan ni. Chuvangin, central sorkarin tribal-te hamṭhatna a rawn duan hi kan state pumpui hamṭhatna a ni nghal," a ti a, ṭstate sorkarin hmasawnna scheme a duan pawh tribal hamṭhatna tur a nih nghal zel thu a sawi.

Mizoram lakah sorkar laipuiin a beisei sâng tih sawiin Chief Minister chuan, "Kan dinhmun an rawn hriat avangin sorkar laipui pawhin he awareness leh benefit saturation camp hi ṭha taka kalpui a, state dangte entawntlak khawpa tihlawhtling turin min beisei. Min beisei ang ngeiin a mawhphurtu zawng zawngte'n tha taka hlen ṭheuh kan tum dawn ni," a ti.

Camp hawnna hi Finance commissioner Vanlaldina Fanai-in a kaihruai a; Assembly speaker Lalbiakzama, PWD minister Vanlalhlana, EFCC minister Lalthansanga, IPR minister Dr Vanlalthlana, DMR minister Prof. Lalnilawma leh Tourism minister Lalnghinglova Hmar bakah, sorkar hotu pawimawh dangte an tel.

PM-DAJGUA hi district hrang hrangah pawh bawrhsapte'n an hawng a ni.

PM-DAJGUA

* Sorkar laipui flagship programme niin, kum 2024-25 aṭanga 2028-29 thleng kalpui tur a ni a; gap filling scheme - scheme awm sa tribal hamṭhatna atan tihkhahna a ni.

* Kum 2047-ah India ram chu ram hmasawn (developed country)-a hlankai tum a ni a, chumi kalkawnga tribal mipui zirtirna leh an mamawh zualpui pekna tura hmalakna a ni.

* Scheme kalpuitu tur line depart-ment-te sorkar laipuiin a thlang. Line department-te'n thawhhona (convergence) hmangin India rama tribal awmna district 549-ah hna an thawk ang.

* Mizoramah chuan line department 14-in district 11-a mi 4,00,000 vel huamin khaw 383-ah an kalpui dawn.