KHAWTHLIR

YMA-in thisen pe

YMA, Champhai Zote Branch chuan YMA Day pualin nimin khan Champhai District Hospital tan thisen unit 34 an pe a, petute mipa 30 leh hmeichhia pali an ni.

Zirlai pass lawmpui

YMA Dinthar Branch chuan June 14, 2025 zan khan Dinthar YMA Inah an veng chhunga tun hnaia pawl 10 leh pawl 12 pass tharte lawmpuina hun an hmang a, bialtu MLA Lalnghinglova Hmar-in a hmanpui. Lalnghinglova Hmar chuan, zirlaite tan khawvel inthlak zel hriatthiam a, zirnaah tih tak zeta kal a hun tawh thu a sawi a, "Veng puma ngaihsan zawng leh ngaihven zawng thlak danglam a pawimawh. Zirlaite'n veng chhungah inelna thianghlim an neih a pawimawh tak zet a ni," a ti.

Anganwadi centre-te'n thing an phun

Saitual District Hub for Empowerment of Women hmalaknain nimin khan Saitual district-a sorkar hotute chuan anganwadi centre hrang hrangah thing phun hnatlang, 'Mass Tree Plantation Drive' an buatsaih. Thing phun hnatlang hi bawrhsap Dr Lalngura Tlau-in Saitual Dinthar venga Anganwadi Centre X-ah a hawng a, thing eng emaw zat an phun a ni.

VC by-election

Mara Autonomous District Council (MADC) huam chhungah vawiin hian VC ṭhenkhatah by-election neih a ni dawn a, VC 13-ah by-election neih a ni ang. By-election neihna tur VC huam chhunga mite leh sorkar pisa, bank leh sikulte tan vawiin hi sorkar chawlhah puan a ni.

Ramah thiin hmu

Rammawia (67) h/o Laltlani, Sihphir Upper Dinthar Veng chu June 15, Pathianni chawhma dar 11:40 vel khan Sihphir ram chhunga Sarêpkâwn thlangah thia hmuh a ni. Rammawia hi June 12 khan a ramchhuak a, a haw loh avangin a chhungte'n an zawng a, ramah thiin an hmu ta a ni. June 15 vêk zan dar 8-ah vui a ni.