'Stop Diarrhoea Campaign' hawn a ni

Reproductive & Child Health (RCH) hmalaknain thla hnih chhung kawṭhalo do beihpui thlakna, 'Stop Diarrhoea Campaign' neih a ni dawn a, nimin khan Health & Family Welfare minister Lalrinpuii'n a pisaah a hawng a; district dangahte pawh hawn a ni.

HFW Minister chuan, India ram pum huapin naupang thih chhan zinga 4.8% chu kawṭhalo a nih thu a sawi a, "Hei hi kan state dinhmun ni chiah lo mah se, kawṭhalo hi naupang natna tlanglâwn tak, enkawl vat loh chuan thihpui theih natna a ni," a ti.

NHM mission director Dr Lily Chhakchhuak chuan, Stop Diarrhoea Campaign chu kum 2014 aṭangin kum tin fûr laiin hman ṭhin a nih thu a sawi a, "Mizoramah pawh India ram hmun hrang hranga hman a nih rualin hman a lo ni tawh ṭhin," a ti a; kumin chuan June 16 aṭanga July 31 chhunga hman tur a nih thu a sawi.

STOP Diarrhoea Campaign thupui chu 'Kawṭhalo vên nan faina leh ORS a pawimawh' tih a ni. Campaign-ah hian HFW department chu School Education, Women & Child Development, Rural Development, Public Health Engineering leh Urban Development & Poverty Alleviation department-te leh Aizawl Municipal Corporation te nen an thawkho dawn a ni.

Campaign chhungin naupang kawṭhalo enkawlna atana ṭha bera ngaih ORS leh Zinc ṭhatna uar lehzuala inzirtir a ni dawn a; health & wellness officer, health worker, anganwadi worker leh accredited social health activist ten an bial chhungah naupang kum 5 hnuai lamte an inah kal chilhin ORS leh Zinc an pe dawn. Sorkar damdawi-in, sub-centre leh anganwadi centre-ahte ORS-Zinc Corner siam a ni bawk ang.