Domestic Workers Day hman a ni

Nimin kha awmpui hna thawktute ni, International Domestic Workers Day a ni a; Centre for Development Initiatives (CDI) New Hope, Aizawl buatsaihin IPR Auditorium-ah hman niin, Mizoram State Commission for Women chairperson C Zodinpuii'n a hmanpui.

Khuallian C Zodinpuii chuan, awmpui hna thawktute chu an dikna leh chanvote hre turin a chah a, "Mi tin hian dan hnuaiah dikna chanvo kan nei a, chu chu kan inzahsak tawn a pawimawh. Awmpui hna thawhnaah hian hleilenna - kut inthlak, mipat hmeichhiatna lam hawia inkhawih, ṭawngkam mawi lo leh diriam taka inṭawng khum leh hlawh inpek duh lohte a awm thei a, hengah hian ṭanpui tur che uin MSCW a awm reng a ni," a ti a, MSCW pan hreh lo turin a chah.

Rinawmna leh dikna nen theihtawp chhuaha hna thawk turin C Zodinpuii chuan awmpui hna thawktute a chah a, "Nangmahni ruaitute tan hnawksaka awm loh tur a ni," a ti a; awmpui hna thawktute kaihhruaina leh hamṭhatna atan sorkarin dan a siam mek thu a sawi.

Kumina Domestic Workers Day thupui chu 'Recognizing case, advancing dignity and rights for the domestic workers' tih a ni. Nimina hun hmanah hian Ferrando Integrated Women Development Centre (FIWDC) Peace Home director Sister Ruth Zonunthari leh Mizoram University Economics department Prof. Lalhriatpuii ten awmpui hna thawktute fuihna leh an hriat tur pawimawhte an hrilhfiah.

International Domestic Workers Day pual hian khawlai leh vantlang hmun tihfai te, thing phun hnatlang leh caregiving training-te buatsaih a ni bawk.

Centre for Development Initiatives (CDI) hi awmpui hna thawktute hamṭhatna tur leh hmasawnna atana thawk niin, training leh awareness an buatsaih ṭhin a, Aizawlah FIWDC Peace Home enkawlna hnuaiah hma an la mek a ni.