District hrang hrangah PM-DAJGUA hawng

Tribal-te dinhmun chawikanna tura sorkar laipui scheme, Prime Minister's Dharti Aaba Janatiya Gram Utkarsh Abhiyan (PM-DAJGUA) Awareness & Benefit Saturation Camp chu nimin khan district hrang hrangah hawn a ni. Scheme hian Mizorama district 11-a khaw 383-ah mi 4,00,000 vel a tuam dawn.

Aizawlah chuan PM-DAJGUA hi bawrhsap Lalhriatpuia'n DC confernce hall-ah a hawng. DC chuan, PM-DAJGUA chu tribal-te ei bar zawnna leh an khawtlang dinhmun chawikan te, eiin ṭha leh zirna ṭha te, inkalpawhna ṭha te, in leh lo ṭha zawkte pek tumna scheme a nih thu a sawi a; line department hotute chu theihtawp chhuah turin a chah.

PM-DAJGUA hi Aizawl district-a RD block pali hnuaia khaw 42-ah kalpui tum a ni a; khaw thlan chhuahte hnenah mipui hamṭhatna leh hmasawnna tur scheme hrang hrang inzirtir leh scheme la dawng lote'n an dawn kim vek theihna turin an khuaa kal chilha a theih ang anga tihsak tum a ni.

Siaha bawrhsap VL Hruaizela Khiangte chuan DC mini conference hall-ah a hawng. Siaha district-ah chuan khaw 27-ah kalpui tur a ni a; sorkar department-te chu ṭha taka thawkho a, mipui hamṭhatnate a zau thei ang bera puangzar turin an inchah.

Champhaiah chuan Circuit House conference hall-ah SDO (Sadar) Ngulzaṭhuama'n a hawng. Champhai district-a khaw 30-ah kalpui a ni a, Aadhaar operator-te leh common service centre-te bakah, a kaihhnawih department/office 10 vel aṭangin official-te tel tura ruahman a ni.

Mamit bawrhsap K Laltlawmlova chuan DC conference hall-ah PM-DAJGUA a hawng a, "Sorkar laipuiin a ngaih pawimawh 'Doorstep Governance' hi kan zawm ṭhat a ngai a, mipui rawngbawltu kan nih angin district hmasawn nan theihtawp kan chhuah a ṭul," a ti. Awareness and Benefit Saturation Camp hi Mamit district-a khaw 57-ah kalpui a ni ang.

Khawzawlah chuan DC pisa tualah bawrhsap K Vanlalṭhiana'n a hawng a; mipui tana hamṭhatna pek theih zawng zawng a tam thei ang ber pek a nih theih nan theihtawp chhuah turin sorkar official-te a chah.