Krismas nía biak-ina inkhawm vangin Sorkarin Vaitin EFCI Kohhran a hrem

Vaitin, Aizawl district-a Evangelican Free Church of India (EFCI) Kohhran chu Krismas ni, December 25 khan biak-inah kohhran inkhawm an buatsaih avangin police-te'n Rs. 5,000 an chawitir.

Sakawrdai khuaa EFCI Kohhran pawh Krismas ni-ah biak-ina an inkhawm avangin police-in Rs. 5,000 an chawitir thu nimin khan tarlan a lo ni tawh bawk.

Zawhna chhángin Vaitin EFCI Kohhran hruaitute chuan, Isua Krista pian champha chu lâwm lo thei 

loah an inngai tih an sawi a; chutih rualin, inkhawm chu Kohhran Committee rawtna anga tih a ni lo a, Krismas ní khan kohhran upa pakhatin biak-in dár a vua a, inkhawm châk leh inkhawm loh theih loha ngaite'n biak-in panin, an inkhawm a, hlate an sak bakah, pastor-in thuchah a sawi tih an sawi bawk.

Vaitin EFCI Kohhran hruaitute sawi danin, pastor-in Pathian thuchah a sawi hma chiahin Kohhran Chairman leh Pastor chu police-te'n biak-in aṭangin an ko chhuak a, thil awmzia an zawtfiah. Police-te chuan inkhawm lai tihbuai an duh loh thu an sawi chungin, inkhawm chu dan bawhchhiatna a nih avangin an tih tur an tih a ngai tih an sawi a; sorkar dan angin Rs. 5,000 an chawitir a ni.