Covid-19 hri thar laka inbuatsaih dan

Covid-19 chungchanga state nodal officer leh sorkar thupuangtu Dr Pachuau Lalmalsawma chuan UK leh ram dang ṭhenkhata Covid-19 hrik thar lêng mek Mizorama a thlen palha hmachhawn tura Mizoram sorkar inbuatsaih dan a sawifiah a; India ram páwn aṭanga Mizorama lut turte chu Lengpui Airport-ah uluk takin a bika ngaihven an nih thu a tarlang.

Hemi chungchanga sorkar thuchhuah chuan, "Covid-19 hrik thar, Europe rama léng mek chu tuna khawvel pumpui tuam mektu aiin inkài chhàwn theihna 70% laia awlsam zawk leh fimkhur leh uluk taka invèn ngai a nih avangin India sorkarin hma nasa takin a la mek a, Central sorkar kalphung zûla state sorkar zawm tura ruahmante bawhzuiin Mizoram pawhin rang takin hma a la ve nghal a ni," a ti.

Dr Pachuau Lalmalsawma mipui hnena ngenna a tichhuak bawk a, "Tunlaia Covid-19 natna hrik thar, UK leh Europe ram ṭhenkhata léng mek lakah Mizoram kan himna turin, India ram páwn aṭanga Mizorama haw tur leh zin tur, chhungte leh ṭhiante nei chuan a rang thei ang berin  helpline number 102 (toll free) / 0389-2323336/ 03892322336/ 0389-2318336-ah inhriattir turin kan ngen e," a ti.

Mizoram sorkar hmalak dan:

1.    Ram pawn aṭanga Mizorama lut tur reng reng Lengpui Airport screening-ah uluk takin a bika ngaihven mek a ni.

2.    Video conference pawh December 28, 2020 chawhnu khan National Centre for Disease Control (NCDC) huaihawtin ram pum huapin state hrang hrang IDSP-te'n an nei a; hmalakna tur hrang hrang sawiho a ni.

3.    Khualzinte endik hna pawh international leh domestic airport-ah ngawrh taka neih mek a ni a, November 25 aṭanga December 28 chawhma thleng khan UK aṭanga India ram lut mi mi 3,318  chhinchhiah a ni. Mi 3,318 zinga mi pasarih chu tun hnaia Mizoram lut tawh leh Mizoram pan mekte an ni.