FES tan in leh lirthei thar neih tum

Home minister Lalchamliana chuan, Home department hnuaia Fire & Emergency Services-in project an siamte a hlawhtlin theih chuan, in thar leh lirthei thar eng emaw zat neih tum a nih thu a sawi.

Fire & Emergency Services (FES)-in an din champha vawi 48-na puala souvenir an buatsaih nimina FES Recreation Hall-a a tlangzarhnaah Lalchamliana chuan project siamte a hlawhtlin chuan FES tihchak tum a nih thu a sawi a ni.

Lalchamliana chuan, sum leh pái indaih lohna avangin district thar pathum - Saitual, Khawzawl leh Hnahthialahte fire station hawn theih a la ni lo tih a sawi a, "Chutih laiin, fire tender indaih lohna hriain tunah hian State Disaster Management Authority phalnain fire tender thar pathum sak mek a ni," a ti.

Home Minister chuan, FES-a thawkte chu engtik lai pawha inrálring reng tur leh ruih theh thila inthiar fihlîm tura chah a; kângmei tichhuak lo tura fimkhur turin mipui a chah bawk. Minister hian FES-in an din champha vawi 48-na an thleng chu lawmawm a tih thu sawiin, thawktute chu duhsakna a hlàn a ni.

Fire & Emergency Services hi Mizoramah September 1, 1972-ah din a ni a, a tìr lamah chuan Fire Service Organisation tih niin, Superintendent of Police enkawlna hnuaiah an awm ṭhin. Kum 2008-ah director post siam a ni a; Mizoramah fire station 14 a awm mek.

FES souvenir tlangzarh inkhawm hi FES director C Lalthanmawia'n a kaihruai a ni.