Sorkar damdawi-in ni lo intelkhawmte'n MUHCS an zawm loh chhan sawifiah
Sorkar damdawi-in ni lote intelkhawmna pawl, Non-Govern-ment Hospital Association of Mizoram (NGHAM) chuan thuchhuah siamin, Mizoram State Universal Healthcare Scheme (MUHCS) an la zawm ve loh chhan an sawifiah.
NGHAM chuan MUHCS hi a kalphung mumal tawk loa hriaiin an la zawm ve rih lo tih tarlangin, "Kan harsatnate chingfel tura sorkar thuneitu hrang hrang nena vawi eng emaw zat sawiho a ni tawh chung pawhin inremna ala awm thei chuang loa, a pawi kan ti hle a ni," an ti.
MUHCS an zawm lo chu a nghawng a nasa tih tarlangin NGHAM chuan, "Mipuiin nasa takin harsatna an tawk tih kan hria a, min hriatthiam hram hram kan ngenin kan beisei a ni," an ti a, tun dinhmuna MUHCS an zawm ve theih rih loh chhan mipui hnena hrilhfiah ṭula an hriat thu an tarlang.
NGHAM chuan MUHCS chu damloten damdawi-in awmna bill an chawi ngai lo (cashless) tura ruahman leh kalpui a ni tih tarlangin, "Chumi awmzia chu an awmna damdawi-in ten a ṭul ang apiangin an lo enkawl ang a, a senso ṭul zawng zawng an lo tum sak dawn tihna a ni," an ti.
NGHAM tarlan danin, damdawi-in ten sorkarah damlo bill an thehlut ang a, sorkarin damdawi-in hnenah damlo enkawlna man hi a peksak thung dawn. Hetiang hi chuan damdawi-ina ni tina pawisa lut a awm dawn loa, ni tina damlo enkawlna senso hi a hautak tham em avangin, ba ringawta damlo enkawl hi private hospital-ten an tlin lo.
MUHCS hnuaia damlo enkawlna man (rate) hi tuna Mizorama private hospital-a an rate hman tlangpuite aiin 50%–80% velin a hniam zawk. A awmzia chu man tlawm taka damlote a ba thlau ni bawk si a, enkawl tura beisei an ni.
Mizorama private hospital-te’n damlo an enkawlna man leh room mante hi phailama private hospital tam berte aiin nasa takin a tlawm zawk a, chumi aia tlawm lehzuala damlo enkawl hi an dinhmunah thil theih loh tluk a ni. Hei hian damlo an enkawlte hi enkawlna ṭha (quality service & care) pek kawngah nghawng ṭha lo a neih mai a hlauhawm.
Chuvangin hetianga man tlawma damlote an enkawl chuan an damdawi-inte hian tlakchhiat an hmabak a, thawktu tam tak (doctor, nurse leh thawktu dang) hlawh pek tur an nei lo thuai dawn avangin, hna an chan phah dawn a ni.
MUHCS chungchangah hian inbiakna kal lai awm mah se, rate chungchang leh a kaihhnawih thil dangah tihfel harsa leh ngaihtuah tur tam tak la awmin a lang.
Mipuite harsatna tawh mek hi awlsam taka tihtawp a nih theih nan sorkar sum senga enkawl, sorkar damdawi-inte hian MUHCS hnuaiah hian cashless-in damlo enkawl hi kalpui chhunzawm se, private hospital-ah erawh phailam hospital ṭhenkhat sorkarin a ziahluh loh leh pawm loha an phalsak ang tho hian damlote hian an bill hi MUHCS package rate ang hian reimburse/bill leh theih se, sorkar pawisa engmah a hek belh lo bawk ang.
Hetianga Mizoram sorkarin a tithei a nih phawt chuan mipui harsatna tam tak chu a su kiang ngei dawn a, NGHAM pawhin an thlawp nghal dawn a ni.
NGHAM chuan phai lama corporate/private hospital, rate sang tak hmangte nen Mizoram sorkarin inremna an ziak thei ṭha an tih rualin, Mizoram private hospital-te tana rate an chhawpsak nen a inang lo hle tih hriat a nih thu tarlangin, "Hei bakah hian MUHCS hnuaia damlo an enkawl turte hi phai lam hospital-te tan chuan tlem té chauh an ni," an ti.
Damlo tlem té chauh enkawl tur an nih avangin phai lam damdawi-in tan cashless-a enkawl hi a harsa lo tih tarlangin NGHAM chuan, "Mizoram-a private hospital-te tan erawh damlo kan enkawl zawng zawng deuh thaw hi MUHCS hnuaia enkawl tur an nih dawn," an ti a, an tan chuan cashless ringawt chuan enkawl an harsat dawn thu an tarlang.
NGHAM tarlan ṭhenkhat :
# MUHCS kan zawm loh avangin mipuiin harsatna nasa tak an tawk tih kan hria.
# Cashless chuan ni tina pawisa lut a awm dawn loh avangin, a ba ringawta enkawl private hospital-te'n kan tlin lo.
# MUHCS hnuaia damlo enkawlna rate hi tuna kan rate aiin 50%–80% velin a hniam zawk.
# Rate hniam lutuka enkawl chuan damlo enkawlnain a tawrh theih bakah, thawktu hlawh pek tur kan nei lo thuai dawn.
# Sorkarin phai lam damdawi-in leh Mizorama private hospital-te rate a chhawp chhuah a in ang lo hle.