Vantlang Viltu Mobile Application tlangzarh

Chief minister Lalduhoma chuan nimin khan Serchhip DC Pisapui Hall-ah Serchhip mipuite'n khawtlang tana hnawksak leh ṭha lo an hmuhte awlsam taka sorkar thuneitute hnena a thlalak nen an report theihna tur 'Vantlang Viltu Mobile Application' a tlangzarh.

Lalduhoma chuan, Vantlang Viltu Mobile Application buatsaihtu District Bawrhsap leh a thawhpuite chungah a lawm thu a sawi a, "Mipui leh sorkar inlaichinna tipungtu tur, thawhhona tiṭhatu tur, chawpchilh taka mipuite mamawh tihhlawhtlinna, harsatna tawkte ṭanpuina ni nghal tur a ni a, mipuite'n ṭangkai taka hman kan tum ang a, mipuite'n harsatna an rawn sawi apiangte chu a mawhphurtuten ṭha takin kan lo bawhzui ṭhin dawn nia," a ti.

Chief Minister chuan, "Sorkar langtlang leh huapzo kan kalpui zelna lamah he application hian min ṭanpui thei dawn a, district dangah pawh kalpui thei ila a duhawm khawp ang," a ti bawk.

Vantlang Viltu Mobile Application kaltlang hian mipuite'n dan phal loha tuichhe paih, kawngpui tihnawk, bawlhhlawh paih leh halral, damdawi rui leh hralh, kangmei chhuak, vanduaina thleng, transformer chhia leh electric kaihhnawih harsatna, traffic rules bawhchhia, tui connection lama harsatna bakah mipuite'n ni tin nuna harsatna an tawh zinga sorkarin a hriat vat ngai chi angte a thawn theih dawn a ni.

Tlangzarh inkhawm hi additional DC Lalrinzuala'n a kaihruai a, bawrhsap Paul L Khuma'n application an siam chhan sawifiahin, application hman dan inzirtirna neih nghal a ni.