KHAWTHLIR

IAS pahnih rawn dah thar

Sorkar laipui chuan Mizorama awm turin IAS officer pahnih a rawn dah thar dawn a, an hna chanpual tur tihfel a la ni lo. IAS rawn awm thar turte hi Sudhir Kumar, 1999 batch leh Vinod V Kavle, 2008 batch-te an ni.

DAJGUA camp ṭan

Siaha district-a sorkar office pasarih chuan nimin khan Noaotla-I, Noaotla-II, Chhaolo -I leh Lobo-1 ahte Ministry of Tribal Affairs hnuaia tribal mite chawikanna tura Prime Minister Dharti Aaba Janjatiya Gram Utkarsh Abhiyan (PM-DAJGUA) peng pakhat, DAJGUA Awareness & Benefit Saturation camp an kalpui ṭan a; Aadhaar card siam leh update, MGNREGA card siam, mid-day meal awareness, ran hri danna pek bakah service hrang hrang an kalpui a ni.

Chhiah ba lo turin hriattir

Lawngtlai district transport officer (DTO) Margaret J Vanlalremmawii chuan hriattirna tichhuakin, tun hnaiah lirthei tax/fee ba an pun nasat thu a tarlang a, "Motor registration hi kum 15 a dam a, kum tina kan tih ṭhin angin December 31-a lirthei kum 15 tling chin chu tax/fee an batte pe vek tur leh an registration tinung tura hriattir an ni. Thla thum chhung hun pek niin, hun tiam chhunga hma la lo chu blacklist-a 'Not to be Transacted' category-ah dah zel an ni ang," a ti.

Thiin hmu

Lalrindiki (45) d/o Hualrozama, Kulikawn West chu June 17, Thawhlehni zan dar 10:30 vel khan Tlangnuam West huam chhung kham mawngah thia hmuh a ni. Thudawn danin, Lalrindiki hi rawtuai khawrh turin a chhuak a, a haw lawk loh avangin zawn a ni a, a tlakna nia an rinhlelhah Kulikawn West Adventure Club-te hrui hmanga uaithlain an zawng a, thiin an hmu a ni. A chesual palh niin an ring.

BJP-in seat la tam ber

Mara Autonomous District Council (MADC) chhunga village council 13-a seat 29 by-election ah BJP-in seat 15 lain an la tam ber a, ZPM-in seat pariat, INC leh independent (IND)-in pathum ve ve an la bawk.