Lunglei dist-ah vohbik 1,262 an awm; electoral roll-ah 397 inziaklut tawh

Inthlannaa vohbik, persons with disabilities (PwD)-ten vote an thlak bakah an chanvo turte an hmuh theih nan nimin khan Lunglei district bawrhsap Navneet Mann kaihhruaiin Lunglei District Monitoring Committee on Accessible Election leh Project LEAP member-te an ṭhukhawm a; Lunglei district-a MLA bial parukah electoral roll-a inziaklut vohbik 397 an awm tih tarlan a ni.

Lunglei District Monitoring Committee on Accessible Election (DMCAE) hi Election Commission of India thupek anga pianphunga rualbanlote awlsam zawka inthlanpui leh a kaihhnawih hmalaknaah kim taka an tel theih dan tur ngaihtuah tura din a ni a; Project Lunglei’s Empowerment for Access and Equity for all Persons (LEAP) hi Lunglei district-a vohbikte chawikanna tura hmalakna a ni.

Navneet Mann chuan, mipui rorelna (democracy) atana inthlanna reng reng chu mi tin huap zo leh vohbikte tan pawha remchang a nih a ṭul thu a sawi a, "Vote neih chungchangah te, inkal pawhna leh chet velna chungchangahte vohbikte'n an dikna leh chanvo an hmuh a, hmaih bik an nih loh nan sorkar chuan remchanna siamsak turin theihtawp a chhuah ṭhin," a ti a; vohbikte tana ruahmanna hrang hrang siam kawngah DMCAE leh Project LEAP-te thawhhona a pawimawh thu a sawi.

Lunglei District Elec-tion Office chhinchhiah danin, Lunglei district-a MLA bial parukah electoral roll-a vohbik inziaklut leh chhinchhiah 397 an awm a; Lunglei North AC-ah 82, Lunglei East AC-ah 79, Lunglei West AC-ah 56, Lunglei South AC-ah 85, Thorang AC-ah 55 leh West Tuipui AC-ah 40 an ni.

January - March, 2025 chhunga Project LEAP hnuaia Lunglei district-a vohbikte dinhmun zirchianna aṭanga a lan danin, Lunglei district-ah hian vohbik 1,262 an awm a; vohbikte zawn chhuahna tur leh Unique Disability ID Card la nei lote siamsakna tura 'health assessment camp' kalpui aṭangin engemaw zat hmuh chhuah belh an ni bawk.

Ṭhukhawm chuan Project LEAP hnuaia vohbikte chhinchhiahna leh Election Office lam chhinchhiahna enkawpin, kum 18 tling tawh vohbikte leh vote nei thei, electoral roll-a la chuang lote zawn chhuah a, ziahluh an nih theih nan hmalak ni se, an ti a; hmalak dan tur leh hmachhawp hrang hrang an sawiho a ni.