Mahni zawnah ṭheuh ram leh hnam tana thawk chhuak ni vek ila tih hi kan hmathlir - Chief Minister

MZP Headquarters, Serchhip chuan nimin khan DC conference hall-ah kumin HSLC, HSSLC leh MPSC exam-a tiṭhate lawmpuina an buatsaih a; chief minister Lalduhoma'n hmanpuiin, "Mahni zawnah ṭheuh ram leh hnam tana thawk chhuaktu ni vek thei ila tih hi kan hmathlir a ni," a ti.

Lalduhoma chuan, Mizoram Engineering College chu zirna kalpui thuai a nih tur thu te, Mizoram State University nei tura hmalak a nih thu te, NIT Mizoram leh ITI tichangtlung turin hmalak a nih thute a sawi a, "Kan ṭhalaite hi a theiin sorkar hna thawk se, a theiin company-ah hna thawk se, a thei chuan ram pawnah hna thawk se, a titheiin sumdawnna leh thilsiamnate din se. Mahni zawnah ṭheuh ram leh hnam tana thawk chhuaktu ni vek thei ila tih hi kan hmathlir a ni," a ti.

Mizoram chu fully literate state-ah tun hnai khan puan a nih thu leh hun rei tak aṭang tawhin Serchhip district chu India rama district level-a literacy sang ber an nih thu sawiin Chief Minister chuan, "Zirna kan uar a, lehkhathiam tam tak neih hi kan inhmeh a ni. Vawiina kan chawimawite hi ka lawmpui che u a, harsatna tam tak paltlangin in bei hram hram a, in thawhrim rah ṭha takin in seng ta a ni. In kal zelna turah pawh taima taka inbeih chuan hnehtu in ni zel ang," a ti a; zirlai zawng zawng pass vekna sikul hotute chu chhungkaw tam tak tan malsawmna an nih thu a sawi.

He hun hi MZP Hqrs. Serchhip vice president Lalhlimpuia'n a kaihruai a; bawrhsap Paul L Khuma, MZP Gen. Hqrs. president H Lalthianghlima leh MZP Hqrs. Serchhip president Darchhuana te pawhin thu an sawi.

HSLC topper PC Lalṭhakimi bakah distinction-a pass mi 43, HSSLC distinction-a pass mi pathum, 100% pass percentage nei sikul panga leh civil service tling thar pathum - Samuel Malsawmzuala (MCS), R Vanneihtluanga (MIS) leh Lalthlamuana (MPS)-te hnenah chawimawina hlan a ni.