Lunglei Day hman ṭha ti

Lunglei Municipal Council (LMC) huaihawta khawtlang hruaitute inrawnkhawm chuan Lunglei Day (Leitlangpui Ni) hman ṭha an ti a; LMC Executive Council-in hma latu tur committee a din dawn.

LMC chairman Lalzuithanga kaihhruaiin tun hnai khan LMC BoC Hall-ah 'Lunglei Day (Leitlangpui Ni)' hman chungchanga inrawnkhawmna neih a ni a; pawl hrang hrang aiawh leh khawtlanga mi challang, sawm bikte an tel. Ṭhukhawm chuan Lunglei Day hman chu ṭha an ti a, LMC Executive Council-in hma latu tur committee din se, an ti.

He hunah hian Lunglei Day hman hun tur chungchangah British-in Lunglei awp nghet tura kum 1898-a Lunglei an luah ṭan hunte rawt a ni a; mi tin huap zo tur leh Lunglei khawpui leh mihring chengte'n Lunglei hmangaihna kawngah hma an sawnpui ngei theihna tura hun hman dan tur ruahmanna siam ni se, Lunglei Day hman dan tur ruangam leh hmalak dan turte duang turin LMC Executive Council-in committee din se, an ti bawk.