MCAB annual review meeting

Mizoram Cooperative Apex Bank (MCAB) chuan nimin khan an chairman Lalnunsanga hoin Aijal Club-ah kum 2024-25 chhunga an hmalakna hrang hrang thlirletna (annual review meeting) an nei a; MCAB Branch 31 manager-te, senior officer leh board of management member-te an tel.

MCAB hotute ṭhukhawm chuan bank hmalakna hrang hrangte bakah bank-in awlsam zawka loan a pek chhuah leh a vil theihna tur 'Loan Origination System (LoS)' an hman tur te, sorkar nena hmalakna handholding policy leh PACS awareness chungchangte an sawiho a; bank policy hrang hrangte ennawnin a pawm nghal a ni.

Board Meeting chuan khawpui chhunga mipuite'n bank kal kher lo leh sum ni tin an khawl theihna tura pawisa khawntu tur pigmy collector pali a la nghal a; bank thawktu post 56 (officer 14, clerk 28 leh subordinate 14) siam belh an remti bawk.

Tarlan danin, MCAB hian kum 2024-25 chhung khan deposit cheng vbc 1694.21 an dawng a, loan cheng vbc 1217.64 pe chhuakin, cheng vbc 45.77 an hlep a ni.