COVID-19: Mizoram dinhmun Hripui vei mi 2 hmuh belh a ni

December 27, Pathianni khan Mizoramah Covid-19 vei mi pahnih hmuh chhuah a ni a, Mizoram chhunga kái chhâwng leh natna (Covid-19 symptom) lang chhuak ve ve an ni. Nimin khan hripui laka fihlim tawh mi 19 chhuahtir an ni thung.

Covid-19 vei Pathiannia hmuh tharte chu Lawngtlai Electric Venga nufa, hmeichhia ve ve an ni a, Rapid Antigen Test (RAT) hmanga enfiah an ni. Nu zawk hi kum 27 mi, Lawngtlai District Hospital-a nurse a ni a, a fanu hi thla 8 mi a ni. Covid-19 symptom lang ve ve an ni a, hri an kàina hriat a ni lo.

Pathianni khan TrueNAT-PCR hmangin district pathumah swab sample 59 endik ni mah se, hripui vei hmuh chhuah a ni lo a; ZMC laboratory-ah sample endik a ni lo bawk.

Nimin khan Covid-19 laka fihlîm tawh mi 19 chu enkawlna hmun aṭangin chhuahtir an ni a; Aizawl district-ah mi paruk, Lunglei district-ah pasarih, Champhai leh Lawngtlai district-ah pahnih ve ve, Serchhip leh Hnahthial district-ah pakhat ve ve an chhuak.

Mizorama Covid-19 vei mi 4,184 hmuh chhuah tawhte chu mipa 3,075 leh hmeichhia 1,109 an ni a; nimin tlai dar 5 thleng khan damin mi 4,068 (97.23%) chhuahtir an ni tawh a, mi pariat (0.19%) thi tawhin, enkawl mek mi 108 (2.58%) an awm.

December 27 thleng khan Mizoramah swab sample 1,76,234 endik tawh niin, chu'ng aṭanga Covid-19 positive hmuh chhuah tawh 4,184 chu 2.40% a ni.

Mizorama Covid-19 positive hmuh chhuah tawh mi 4,184 zinga mi 1,985 chu Mizoram chhunga kái an ni a, mi 2,199 chu state páwn aṭanga rawn lût an ni.