June 23-ah Hulhliap Short Stay Centre hawn tum
Social Welfare minister Lalrinpuii chuan nimin khan IPR Lianchhiari Rûn-ah Social Welfare department leh School Education department ṭangkawp buatsaih ‘Drug Abuse Prevention Programme for Middle School Teachers’ a hmanpui.
‘Hulhliap Short Stay Centre’ (SSC) chu Synod Revival Camping Centre, Neihbawih-ah June 23, 2025 aṭangin hawn tum a nih thu tarlan a ni.
Lalrinpuii chuan, Mizoramah kum lama naupang tê tê ruihhlo khawih an tam hle tih a sawi a, " Zirlai naupang zingah pawh ruihhlo hman sualna laka fihlim tura zirtirna pek a pawimawh takzet tawh a, zirlai naupangte chu an hun tam zawk sikula hmang an nih avangin zirtirtute hian naupangte nunah hmun pawimawh tak in luah a ni," a ti.
Naupangte ruihhlo laka an filhim theih nan zirtirtute’n mawhphurhna lian tak an neih thu sawiin Social Welfare Minister chuan, "Zirtirtute leh zirna-in a thawktu hrang hrangte pawh zirlai naupangte entawn tlaka an nun an vawn uluk a pawimawh," a ti a, zûk leh hmuam thlenga insum turin a chah.
He hun hi School Education director Angela Zothanpuii'n a kaihruai a; Social Welfare additional secretary Lalnunhlua'n thupui sawi hawngin, naupangte chu ram rohlu an nih angin ruihhlo hmansual laka venhim an ṭul thu leh zirtirtute chu naupangte entawn leh ngaihsan an nih avangin naupangte ruihhlo ti lo tura zirtirna kawngah an pawimawh thu a sawi.
Tarlan danin, ruihhlo ngaite enkawlna tur hmun, ‘Hulhliap Short Stay Centre’ (SSC) chu June 23, 2025 aṭangin Synod Revival Camping Centre, Neihbawihah hawn tum a ni a, he hmunah hian ‘International Day Against Drug Abuse & Illicit Trafficking’ pualin June 26, 2025-ah hun hman tura ruahman a ni. International Day Against Drug Abuse & Illicit Trafficking pual hian sikul naupangte tan programme hrang hrang–essay writing competition-te, short video/reels competition leh choir competition-te buatsaih a ni.